Shënim: Receta është realizuar nga blogerja jonë e gatimit Jona Sulejmani, e cila çdo herë e më shumë do të pasurojë rubrikën tonë të Kuzhinës me pjata të veçanta dhe të thjeshta.
Të gjithë ne që gatuajmë vihemi përpara dilemave të ditës. Cfarë do të gatuajmë në drekë ? Po mirë, ja dreka iku. Po për darkë cfarë do të sajoj ? Le të jemi realistë. Nuk është aspak e lehtë të jesh shefi i kuzhinës. Vaktet duhen të jenë të ndryshme nga njëri-tjetri dhe gjithmonë të shijshëm që cdo pjesëtar i familjes të mbetet i kënaqur.
Receta që do të ndaj me ju sot është një nga recetat e mia të preferuara. Kjo sepse unë i adhuroj erëzat dhe shijen e tyre unike në gatime. Dhe për të gjithë ato si puna ime , kjo pjatë është një parajsë erëzash. Por mund dhe ta thjeshtëzoni duke përdorur erëzat që ju preferoni... Pjata e sotshme është një pjatë e lehtë, me shumë proteina dhe pak kalori. Në më pak se 40 minuta , të dashurit e mi do të keni gati një vakt të shijshëm dhe perfekt për darkën. Unë gjithmonë e shoqëroj me pite të bëra në shtëpi ose bukë të thekur dhe më besoni, të gjithë mbeten të ngopur dhe të kënaqur.
Përbërësit për 4-5 persona janë :
1 qepë mesatare , e grirë në kubikë
3 thelpinj hudhra , të grira në rende
2 speca të kuq , të grirë në kubikë
1 spec djegës
6 vezë
400 gr domate të prera në kubikë
1 filxhan caji ujë
2 lugë vaj ulliri
1 lugë caji kumin
1 lugë caji piper i kuq i ëmbël
½ lugë caji rigon
1 lugë caji kripë
½ lugë caji piper i zi
Majdanoz i freskët
Djathë i bardhë i thërrmuar
Përgatitja:
Në një tigan të thellë , hedhim vajin e ullirit dhe sapo të ngrohet , shtojmë qepën , hudhrën, specat e kuq dhe specin djegës (të grirë dhe pa fara).
I skuqim për rreth 7 minuta derisa të zbuten plotësisht dhe të marrin ngjyrë kafe.
Shtojmë domatet , ujin dhe të gjitha erëzat me rradhë. Mua më pëlqen të përdor dhe lëng pule për një shije më të vecantë. Gjithmonë të bërë vetë në shtëpi. (Do t’ju flas njëherë tjetër si ta bëjmë lëngun e pulës apo mishit në shtëpi).
E lëmë të ziejë me zjarr të ngadaltë për rreth 20 minuta. Më nje lugë druri , hapim vend për vezët dhe i hedhim.
I lëmë të gatuhen me kapak për 6-7 minuta nëse i doni poche ose më shumë minuta nëse të verdhat i doni të gatuara mirë.
E heqim nga zjarri. Hedhim sipër majdanoz të fresktët të grirë hollë dhe djath të bardhë të thërrmuar.
E servirim me pite ose me bukë të thekur !
Ju bëftë mirë !
Kjo recetë ka një kosto prej 500 lekësh.
Këshilla:
Nëse ju pëlqejnë ushqimet pikante , mund ta shtoni dozën e specit djegës. Në të kundërt , mos hidhni spec djegës. Mund të përdorni erëzat qe ju pëlqeni. Për lehtësi , unë përdor domate të konservuara të prera në kubikë. Por ju mund të zgjidhni midis aty të konservuarave ose të freskëtave.
