Të gjithë ne, në mesin tonë e dimë se kur vjen puna te vaji i ullirit që tregtohet në dyqane apo supermarkete vështirë të gjesh vaj të vërtetë e aq më tepër cilësor.
“Shqiptarët blejnë vaj ulliri por nuk konsumojnë të tillë në tryezat e tyre.” Kështu nis një kronikë e Top Channel- it, ku bëhet me dijeni se analizat laboratorike në institucionet shtetërore kanë treguar se një pjesë e vajit të etiketuar si vaj ulliri është thjesht mashtrim.
Në vend të tij, pavarësisht se për çfarë paguajmë na ofrohet përzierje industriale.
Pa u thelluar në përgjegjësinë e autoriteteve përgjegjëse, të paktën mund të mësoni se si ta dalloni origjinalin nga përzierja industriale. Në kronikë eksperimenti i realizuar qe fare i thjeshtë: 4 lloje të ndryshme vajrash u mbajtën në frigorifer.
Nëse vaji është origjinal do të ngrijë me patjetër, në të kundërt keni të bënë me përzierje.
Pas 60 minutash që vajrat u mbajtën në kushte frigoriferike, u morën dhe u bë shqyrtimi i duhur. Strategjia nuk gaboi! Vetëm vaji origjinal mundi të ngrinte.