Shpat Kasapi dhe Afërdita Dreshaj i dhanë fund lidhjes së tyre në vitin 2013, pas një fejese gjashtë vjeçare. Në nëntor të 2014-s, e ftuar në “Top Show”, Afërdita deklaroi se ka vendosur të mos flasë më për jetën private. "Kam treguar shumë gjëra për jetën time personale, historinë 6-vjeçare të dashurisë me Shpat Kasapin, me të cilin kam qenë e fejuar, por tani kam vendosur të mos flas më,” u shpreh ajo. Sot, këngëtarja dhe modelja është e martuar me sportistin e hokejt, Jakub Kindl. Nga ana tjetër, Shpati pritet që së shpejti të kurorëzojë në fejesë lidhjen me një vajzë nga Kosova. Megjithatë hera-herës, për të mos thënë “shumë shpesh”, ai i rikthehet, pa qenë e nevojshme, historisë së dashurisë me Afërditën.
Në tetor të 2015-s, kur Afërdita ishte në një lidhje me sportistin çek, Shpat Kasapi u shpreh për Express Rozë se ndarja “e ka bërë të vuajë”. “M’u desh një vit që ta harroja. Dashuria ka vuajtje.”
Në mars të vitit 2017, në puntatën e fundit të "Your Face Sounds Familiar", këngëtari u prezantua me këngën "Let's Twist Again" të Chubby Checker duke u shprehur se nuk ka asnjë arsye për t'i mbajtur mëri ish-të dashurës së tij, përkundrazi, e ka marrë malli për të.
Në klipin e realizuar gjatë provave me Olta Gixharin, Shpati tha se këngën ia dedikonte ish-të dashurës. Ishte Olta ajo që nisi gjithçka, pasi në përpjekje për të zbërthyer profilin e Chubby Checker, tha se ai ka qenë i lidhur me Miss Botën, ndaj kishte dhe një lloj vetëbesimi që i ndodh burrit kur ka në krahë një femër të bukur. "Edhe unë e kam patur Miss Kosovën...Hajd se po ia kushtojmë asaj," tha Shpati, duke iu referuar Afërditës.
Në mars të një viti më parë, thumboi publikisht marrëdhënien e këngëtares me bashkëshortin. Në foton e postuar nga Ermal Mamaqi, ku shfaqej Xhesika Berberi e cila ishte e ftuar në “Xing me Ermalin”, ndër pyetjet e shumta drejtuar modeles ishte edhe komenti i Shpatit: “Ermal bëja këtë pyetje Xhesikës! Jam Shpat Kasapi! A do të ishe lidhur edhe ti me një djalë jo shqiptar siç është lidhur shoqja jote e ngushtë Afërdita Dreshaj dhe a mendon se kështu do e ruajmë origjinën shqiptare?”.
Asokohe ne kontaktuam me dikë nga stafi i menaxhimit të këngëtarit dhe na u konfirmua se bëhej fjalë për profilin zyrtar të Shpatit, që përdorej nga vetë ai.
Gjithashtu në nëntor të 2018-s, i ftuar në “Shiko Kush Luan”, gjatë rubrikës “Ndaje ose pije”, u pyet se çfarë ndjeu kur dëgjoi për martesën e ish-të dashurës së tij. Pa u menduar 2 herë, Shpati tha se kishte ndjerë një çlirim shumë të madh kur mësoi se Afërdita u martua: “U rehatova!”
Dje, 25 shkurt 2019, te “Da’Sara Show”, zbuloi “padashje” se Afërdita është rikthyer, por ka qenë ai që s’e ka pranuar më! “Të gjithë e dinë atë histori që ka kaluar, se nuk kthehet më.”- u shpreh ai, ndërkohë që moderatorja ndërhyri duke thënë: “Njerëzit edhe kthehen, vetëm të mos i themi gjë njeriu.” Kaq iu desh këngëtarit për të thënë gjithë krenari: “S’e kam pranuar unë!”
Cilado qoftë arsyeja që përfundon një marrëdhënie dashurie, sado dhimbje të ketë lënë pas, askush nuk do të donte që pas shumë vitesh, ish-i të vazhdojë e të ta përmendë emrin lartë e poshtë. Sot, Shpati është në një lidhje siç edhe pohoi në “Mirage”, lidhja do të kurorëzohet në fejesë dhe së shpejti në martesë e ndërkohë po merret me një projekt muzikor. Pra, këngëtari ka mjaftueshëm gjëra për të folur, shumë më interesante se rikthimi tek e njëjta histori: Afërdita Dreshaj!
