Alketa Vejsiu do të ngjitet në skenën e Sanremos në natën e tretë, së bashku me Georgina Rodríguez, partneren e Cristiano Ronaldo-s. Në suplementin Bluetooth të Gazetës Shqiptare, moderatorja zbuloi disa detaje për festivalin.
Vejsiu shprehet se “nuk di si ta përshkruajë emocionin” përsa i përket momentin kur mori vesh se ishte përzgjedhur nga drejtori artistik i Sanremos, Amadeus, emri i vërtetë i të cilit është Amedeo Sebastiani.
“Ishte pika kulmore e karrierës sime. Prej vitesh kam kontakte me televizionin italian, organizatorët më kishin parë në intervistën time në Rai Uno pas tërmetit dhe natyrisht që Festivali i RTSH-së ishte dhe një tjetër hapësirë ku ata konfirmuan që unë isha e duhura për të qenë në atë skenë. Gjithsej do të jenë 5 netë. Unë do të jem natën e tretë së bashku me Georgina Rodríguez, partneren e Ronaldos.”
Përsa i përket veshjeve, Alketa zbuloi se do të vishet nga Dolce & Gabbana dhe një brend shqiptar, të cilin vendosi ta mbante surprizë.
“Do të kem dy veshje, ishin të shumtë brand-et që kërkuan të më vishnin, por kam zgjedhur Dolce & Gabbana për njërën nga veshjet. Natyrisht që veshja tjetër do të jetë një brand shqiptar, por preferoj ta mbaj surprizë.”
Ndër të tjera, moderatorja shtoi se nuk do të përqëndrohet vetëm te prezantimi.
“Programi im është të prezantoj, të këndoj si edhe kam një monolog. Natën e tretë do jenë të ftuar Mika, Massimo Ranieri, Lewis Capaldi, Roberto Benigni, Fiorello, Tiziano Ferro. Këto janë detajet që mund t’ju zbuloj paraprakisht.”
Në fund, Vejsiu theksoi se nuk e priste Sanremon, ndonëse prej vitesh punonte për një karrierë në Itali.
“Kam punuar për të pasur edhe një karrierë në Itali, jam përgatitur për këtë ditë. E mendoja se do të ishte e afërt dita kur do të bëhesha pjesë e medias italiane, por e mendoja se do të vinte si shkallare, pak nga pak, nuk prisja Sanremon. Mediat italiane kanë shkruar fjalë të mrekullueshme dhe për këtë jam edhe më shumë e lumtur dhe mirënjohëse, sepse vlerësimi nga mediat ndërkombëtare është një vlerësim i dyfishtë për mua.”
Sanremo 2020 do të mbahet në datat 4 – 8 shkurt.
