Siç mund ta keni lexuar, për pesë ditë me radhë, nga data 4 deri në 8 shkurt, drejtorit artistik të Sanremo 2020, njëkohësisht prezantues, Amadeus, do t’i bashkohen 10 prezantuese të tjera, përveç Alketa Vejsiut.

Në natën e parë, në skenë do të ngjitet gazetarja sportive Diletta Leotta

dhe analistja e politikës së jashtme arabe, shkrimtarja dhe skenaristja Rula Jebreal. Jebreal është me nënshtetësi izraelite dhe italiane.

Nata e dytë do të ketë numrin më të madh të prezantueseve. Në skenë do të ngjiten gazetaret Emma D’Aquino

dhe Laura Chimenti.

Në rolin e prezantueses do të jetë edhe këngëtarja Sabrina Salerno. Salerno është më së shumti e njohur për këngën “Boys (Summertime Love)” në 1987, e cila kryesoi listat në Francë dhe Zvicër dhe u rendit në Top3 në Mretërinë e Bashkuar.

Përpos D’Aquino, Chimenti dhe Salerno, në skenë do të ngjitet edhe Monica Bellucci, aktorja e njohur italiane që e nisi karrierën fillimisht si modele për Dolce & Gabbana dhe Dior, përpara se të kalonte te filmat italianë, francezë dhe ata Hollywood-ianë.

Në natën e tretë do të prezantojnë Georgina Rodríguez, partnerja e Cristiano Ronaldo-s dhe modele argjentinase.

Në po të njëjtën natë do të prezantojë edhe Alketa Vejsiu, e para dhe e vetmja moderatore shqiptare në Sanremo. “Programi im është të prezantoj, të këndoj si edhe kam një monolog,” u shpreh Vejsiu për Bluetooth në Gazeta Shqiptare. “Kam punuar për të pasur edhe një karrierë në Itali, jam përgatitur për këtë ditë. E mendoja se do të ishte e afërt dita kur do të bëhesha pjesë e medias italiane, por e mendoja se do të vinte si shkallare, pak nga pak, nuk prisja Sanremon.”

Nata e katërt do t’i besohet prezantueses italiane Antonella Clerici

dhe Francesca Sofia Novello, modele dhe e dashura e Valentino Rossi-t.

Në finale, Amadeus-it do t’i bashkohet Mara Venier, veterane e televizionit italian, e njohur më së shumti për show-n “Domenica in”.