Përveç vendeve të njohura tashmë, Shqipëria ka edhe shumë zona fantastike që s'vizitohen shpesh, më tepër për shkak të mosnjohjes. Pak kohë më parë, realizuam një artikull në Anabel.al në lidhje me vendet ku “arratisen” shqiptarët gjatë fundjavës. Duke qenë se pranvera po afron, artikulli është përditësuar me të tjera destinacione. Fillojmë.
Kune – Vain, Lezhë
“Pasi kthehesha me miqtë nga Shkodra, diku afër Lezhës nuk e dimë as vetë si përfunduam në një zonë që s’e kishim parë kurrë. Ishte laguna e Kune-Vainit, ndër më të bukurat që kam parë ndonjëherë. Rruga ishte pak e keqe, sepse dora e njeriut s’e kishte prekur atë zonë (dhe më mirë kështu!). Aty ndodhet një plazh i vogël i virgjër; ishim vetëm ne dhe ndonjë zog që fluturonte aty në horizont. Vendi më i bukur që kam parë. Këtë verë do të shkojmë përsëri.” – shkruan një lexues.
Lugina e Patokut, Laç
“Për ata që s’e kanë vizituar ndonjëherë, vendi ka pamjen më relaksuese, të paktën për mua që gjej qetësi dhe rehati sa herë e vizitoj. Gjithkush që shkon ka privatësinë e tij, futet në një prej këtyre shtëpizave, ku mund të hajë drekën ose darkën. Nga gjithë vendi, vinë njerëz për ushqimin dhe ambjentin fantastik.”
Kallm, Durrës
“Arratisja ime e preferuar sapo vjen pranvera dhe çdo fundjavë kur koha është e mirë. E adhuroj këtë vend dhe qetësinë që më fal. Në dimër bëjmë një xhiro në këmbë, pimë kafe dhe kaq. Kur ngrohet koha pastaj, ka ca skuta perfekte për të bërë plazh dhe e ke të gjithin për vete, pa njerëz nëpër këmbë. Ne shkojmë si fis, presim perëndimin e diellit, ndezim zjarr. Rruga nuk është shumë e mirë, por do ia vlejë!”
Bovilla, Tiranë
“Mua më pëlqen që në fundjavë të jem diku larg Tiranës, larg zhurmës dhe pluhurit. Shkojmë shpesh me miqtë në Bovillë, ndodhet afër dhe pamja është fantastike. Marrim një zgarë, ushqime, pije dhe relaksohemi. Jua sugjeroj të gjithëve.”
Lumi i Shalës – Tajlanda e Shqipërisë
Me gjatësi rreth 38 km, Lumi i Shalës rrjedh prej Alpeve të Shqipërisë nga maja e Radohinës dhe përshkon fshatin turistik të Thethit nëpër vendin që njihet si Lugina e Shalës. Lumi derdhet në liqenin e Komanit, pamja e kristaltë rreth të cilit është mahnitëse. Tjetër vend ku mund të pushoni është zona e njohur si Parku i Blinit, për të cilën nuk kemi asnjë koment shtesë, mjafton të shihni foton në vijim. Lundrim me varkë në liqen, piknik tek Parku i Blinit, zhytje nën ujin e kristaltë të lumit etj., janë disa prej aktiviteteve që mund t’ju shoqërojnë gjatë udhëtimit tuaj pranveror.
Sigurisht që lista është e gjatë, por më së shumti u përqëndruam tek vende jo fort të njohura dhe ato që së fundmi po kthehen në destinacione të preferuara. Nëse keni ndonjë sugjerim tjetër, na shkruani.
