ADHURON STILIN ANDROGJEN
Kostumet dhe veshjet me prerje mashkullore i do shumë dhe i përdor shpesh. “Më ka pëlqyer gjithnjë të vishem si çun. Edhe kur kam qenë e vogël, kam qenë pak si çun!”, na tregon Orgesa. Ka gati më shumë se 20 papijonë e kravata me shumicë! Spila, kapëse, ngjitëse me quotes, që i ngjit nëpër xhaketa dhe xhupa. Edhe maninë e kapelave apo aksesorëve të kokës, nuk e kontrollon dot. Kjo i ka kushtuar në kuptimin e vërtetë qimet e kokës! Sepse flokët i janë dobësuar paksa.
“OMG, I’M SO RETRO!”
E pëlqen shumë stilin e vajzave të kolegjit. Është e pasionuar pas stilit retro francez dhe veshjeve klasike. Përzierjet e stileve british dhe french janë ato që e kënaqin e mendon se i shkojnë më shumë. Ka dhe një dobësi për syzet. I ka nga të gjitha llojet, edhe më të çuditshmet. Na rrëfen me keqardhje se më të çuditshmet këtu mund t’i përdorë vetëm për Halloween. Copat me pika (polka dots) e tërheqin si magnet!
PALIÇETA? JO, FALEMINDERIT!
Orgesa pret të bëhet nënë, por kjo nuk e ka penguar aspak të vishet dhe të ruajë stilin e saj edhe në këtë moment kaq të lumtur, por disi të vështirë për t’u kombinuar. Nuk është e thënë që kur je shtatzënë të vishesh gjithnjë me thasë pa formë! Orgesa, edhe në këtë rast, zgjedh stilin bohemian. I pëlqen shumë fustanet hippie dhe këtë stil komod. “Edhe në këtë rast, por përgjithësisht çdo veshje dhe stil, duhet ta përshtatësh me natyrën dhe fizikun. Është e rëndësishme që çdo femër t’i dijë limitet dhe të njohë konstruktin e vet trupor, në mënyrë që të të duket sa më mirë”, mendon ajo. Këtë gjë mesa duket nuk e zbatojnë shumë ato femra që veshin çizme të gjata mbi gju, pa dallim moshe, peshe dhe konstrukti. Ushqen një antipati të theksuar për këto lloj çizmesh! Ato s’do t’i vishte kurrë as ikona e saj e modës, Audrey Hepburn!
Veshjet e saj s’janë kurrë banale, por gjithnjë ekstravagante dhe jashtë kornizave. E dashuruar me muzikën rrok, nuk do të heqë dorë ndonjëherë nga lëkura dhe ngjyra e zezë. Por ndërkohë ka plot veshje, aksesorë dhe objekte kulti në gardërobën e saj. Stilistja e saj e preferuar është Vivian Westwood dhe Orgesa dashuron çdo gjë që ajo krijon! Epo, kështu shpjegohet!
