Ndarja nga jeta në moshën 53-vjeçare e skulptorit të njohur shqiptar, Arben Bajo, solli sërish në vëmendje përdorimin e plazmës së gjakut si një mënyrë për të luftuar Covid-19. Pak para se të ndërronte jetë, miq dhe familjarë të Bajos, i infektuar me Covid-19, bënë thirrje për dhurues plazme nga personat të cilin kishin kaluar më parë virusin. Në një intervistë për ABC News, Arben Ivanaj, mjek hematolog dhe ish-zëvendësministër i Shëndetësisë dhe Mbrojtjes Sociale, u shpreh:

“[Plazma e gjakut] është një teknikë që ka dhënë rezultate, por rezultate të cilat pritet të rikonfirmohen në studime më të besueshme. Të përdoret trajtimi me anë të plazmës të të sëmurëve të infektuar që kanë antitrupa me Covid-19 është e mundur.”

Ai shtoi se përdorimi i plazmës nuk është një metodë e re:

“Plazmën e përdorim çdo ditë; plazmën përdorin të gjitha spitalet tona pa përjashtim. Nuk është një teknikë e vështirë. Ajo që duhet bërë para se të përdorim plazmën është që të masim titrën e antitrupave. Të kemi një titër antitrupi sa më të lartë në plazmën e donatorit.”

Në vijim, ai tha se “nuk është një teknikë e cila ka siguruar besueshmëri terapeutike”, megjithatë “ngelet një nga teknikat që është përdorur në trajtimin e sëmundjeve që nuk kanë mjekim të rekomanduar”. Ivanaj theksoi se nuk duhet të krijohen iluziose se po u përdor plazma, pacienti ka shërim të sigurt. “Të mos krijojmë iluzione, pasi edhe atje ku është përdorur plazma, vdekshmëria nga Covid-19 nuk ka qenë më e ulët.”

Në fund të korrikut, Ministria e Shëndetësisë dhe Mbrojtjes Sociale miratoi protokollet që lejonin realizimin e testeve serologjike edhe në klinikat private. Testet serologjike janë teste gjaku që përqëndrohen te plazma dhe elementet e gjakut për të parë nëse një person ka qenë i infektuar me koronavirus për të mbërritur më pas te antitrupat. Studime të vazhdueshme thonë se përdorimi i plazmës mund të jetë i dobishëm edhe për Covid-19, megjithatë ka shumë pikëpyetje dhe mbetet ende një metodë kuruese në zhvillim e sipër.