Presidenti i Rusisë, Vladimir Putin, njoftoi këtë të martë (11 gusht) se Rusia është vendi i parë në botë që miratoi një vaksinë kundër Covid-19 pas dy muajsh testimesh te njerëzit, një fakt ky që sipas Putin, është dëshmi e shkencës së niveleve të larta.

Në mbledhjen e qeverisë, Putin tha se vaksina, e zhvilluar nga Instituti Gamaleya i Moskës, ishte e sigurt dhe madje u testua edhe te njëra nga vajzat e tij.

“E di që funksionon me efektivitet, formon imunitet të fortë dhe po e përsëris, i ka kaluar të gjitha kontrollet e nevojshme,” tha ai.

Putin shtoi se shpreson që vendi së shpejti të fillojë prodhimin në masë të vaksinës. Miratimi nga Ministria e Shëndetësisë parashikon testimin në mijëra pjesëmarrës. Ndërkohë ekspertë të shëndetit kanë bërë thirrje që "nxitimi" për të shpikur vaksinën mund të ketë pasoja të rrezikshme.

Sipas të dhënave të OBSH-së, rreth 165 vaksina janë duke u zhvilluar në mbarë botën dhe të paktën katër janë në fazën e tretë të testimit klinik.

Burimi: Reuters