Ish-zëvendësministrja e Arsimit, Sportit dhe Rinisë, Nora Malaj, në një intervistë për News24 rrëfeu betejën e saj me Covid-19. Ish-deputetja e LSI-së tregoi se fillimisht mendoi se ishte ftohur, por skanerat treguan se po kalonte Covid-19.

“Kam kaluar tri javë jo të lehta,” tha ajo. “S’e dija që ishte Covid-19, mendova që ishte ftohje. E ndjeva veten të dobët, kisha temperaturë dhe kollë. Bisedova më pas me mjekun [Pëllumb] Pipero dhe ai u alarmua për shkak të diabetit që e kam pak të agravuar. Bëra disa analiza dhe u konstatua që kisha koronavirus.”

Malaj u shpreh se u prek edhe bashkëshorti i saj. Përsa i përket simptomave, ajo përmendi gjithashtu djersitjen e vazhdueshme, dhimbjen e fortë të kockave dhe humbjen e nuhatjes, përpos kollës së thatë dhe temperaturës.

“Mora hollues gjaku për ta përballuar; më ka lënë disa probleme edhe te sytë, rrugët urinare dhe veshka,” shtoi ajo. Malaj u shpreh se humbi 6 kg në 21 ditë, por po përpiqet të rikuperojë shëndetin.