Kamala Harris është zëvendëspresidentja e parë aziatiko-amerikane në SHBA, zëvendëspresidentja e parë më ngjyrë dhe zëvendëspresidentja e parë grua. Si një figurë e rëndësishme e politikës, njerëzit kishin pritshmëri të larta për kopertinën e saj për revistën që gjerësisht njihet si më prestigjiozja në modë, por duket se puna e Vogue ishte zhgënjyese për pjesën dërrmuese të njerëzve.

Kamala Harris do të jetë në kopertinën e muajit shkurt dhe nisur nga kjo, Vogue publikoi dy foto të setit fotografik. Fill pas kësaj, njerëzit shpërthyen me kritika.

Fotoja në të majtë:

Fotoja në të djathtë:

“Fotoja në të majtë? Ju e dini se është gruaja më e fuqishme në historinë e politikës, apo jo? Ç’dreqin po bëni? Sa shumë punë u desh për këtë? Turp për ju,” shkruan dikush në Twitter. “Supozohet se ju dini shumë gjëra për modën dhe vendosët të publikonit foton në të majtë?” shtoi një tjetër. “Unë dhe telefoni im mund të kishim bërë një punë shumë herë më të hajrit,” lexohet në një tjetër koment në Twitter.

Fotoja në Wikipedia.

Disa ironizojnë se fotoja e Kamala-s në Wikipedia duket shumë herë më e mirë se ajo e realizuar nga Vogue. Ndërsa të tjerë vunë në dukje se ngjyrat jeshile/rozë në foton ku Kamala është me kostum blu të errët dhe atlete Converse përfaqësojnë ngjyrat e Alpha Kappa Alpha, shoqëria e parë studentore për afro-amerikanët. Megjithatë, pavarësisht kuptimit të ngjyrave, disa janë të mendimit se sërish fotoja duket joprofesionale, copa rozë është rrëmujë, e zhubrosur dhe ndriçimi lë për të dëshiruar.

Njerëz të tjerë kritikuarn Vogue për “whitewashing” – zbardhje. Në këtë rast, ata thonë se revista zgjodhi të zbardhte lëkurën e Kamala Harris. “Çfarë rrëmuje. Anna Wintour [kryeredaktorja e Vogue] me të vërtetë nuk do të ketë kolegë dhe miq me ngjyrë,” tha Wajahat Ali që bashkëpunon me New York Times.

Vitin e kaluar, Wintour u kërkoi falje anëtarëve të stafit në një letër ku shprehej se Vogue nuk kishte bërë mjaftueshëm për përfshirjen e njerëzve të racave të ndryshme. "Vogue nuk ka gjetur mënyra të mjaftueshme për të përkrahur ose për t'u dhënë hapësirë redaktorëve, shkrimtarëve, fotografëve, dizajnerëve dhe krijuesve të tjerë afro-amerikanë,” shkroi ajo.

Fotot e Kamala Harris u realizuan nga Tyler Mitchell, fotografi i parë afro-amerikan që bashkëpunoi me Vogue në historinë 125-vjeçare të revistës kur në shtator 2018 fotografoi Beyoncé-n. Vogue mohoi për New York Post se ka zbardhur lëkurën e Harrisit, por megjithatë kjo nuk i pengoi kritikat që të vazhdonin.

Një burim për CBS News thotë se fotoja me kostum blu dhe Converse ishte parashikuar si një foto që do të përdorej në revistë, por jo si kopertinë. Sipas të njëjtit burim, ekipi i Vogue ndryshoi plan pa njoftuar së pari ekipin e Kamala Harris, i cili nuk ra dakord me ndryshimin. 

Artikulli i përditësuar këtu*