Norvegjia, Suedia dhe Danimarka do të vazhdojnë një pauzë për vaksinat AstraZeneca për Covid-19, pavarësisht përfundimit të Agjencisë Europiane të Barnave (EMA) se vaksina është "e sigurt dhe efektive". Të tre vendet thanë se po shqyrtonin vendimin e EMA-s që thotë se përfitimet e vaksinës tejkalojnë rreziqet e saj. Ndërkohë vende të tjera po planifikojnë rinisjen e vaksinimit me AstraZeneca.

Italia, Franca, Gjermania dhe Spanja thanë të enjten se kanë në plan të rinisin vaksinat AstraZeneca pas deklaratës së EMA-s.

Vaksina kundër Covid-19, e prodhuar nga AstraZeneca është "e sigurt dhe efektive" dhe mbi të gjitha duhet vijuar me përdorimin e saj. Ky ishte vendimi i marrë nga Agjencia Europiane e Barnave pas analizave dhe shqyrtimeve të detajuara në lidhje me mpiksjen e gjakut që thuhej se shkaktonte përdorimi i kësaj vaksine.

Drejtoresha ekzekutive e agjencisë, Emer Cooke deklaroi se nuk ka të dhëna se rastet në fjalë, të cilat sipas saj janë “shumë të rralla”, janë shkaktuar nga vaksina.

Burimet: Euronews, Guardian