Shqipëria

Ministrja e Shëndetësisë flet për çlirimin e jetës social-ekonomike

Shkruar nga Anabel

4 Maj 2021

Ministrja e Shëndetësisë flet për çlirimin e

Jeta social-ekonomike duket se është drejt hapjes, ndonëse do të shoqërohet me masën e distancimit fizik, vendosjen e maskës dhe mbajtjen e higjienës. Në fjalën e saj në Kuvend, ministrja e Shëndetësisë dhe Mbrojtjes Sociale, Ogerta Manastirliu, foli për procesin e vaksinimit dhe lehtësimin e masave.

“Është fakt që tashmë kemi një përgjysmim të incidencës dy-javore për 100,000 banorë dhe ka një rënie të ndjeshme të shtrimeve në spital nga javët që lamë pas, duke ulur kështu edhe pozitivitetin i cili është tashmë 4% mesatarisht.” – tha ministrja.

“Sot janë rreth 100 mijë qytetarë që i kanë kryer të dy dozat e vaksinës, duke siguruar një mbrojtje më të mirë nga virusi i rrezikshëm,” shkroi ajo në Facebook. “Jemi të vendosur të intensifikojmë vaksinimin anti-covid, por ky është një moment që na thërret të gjithëve për më shumë përgjegjësi, për respektimin e rregullave anti-covid, për të mbajtur në kontroll epideminë në vend.”

Ulja e rasteve të të infektuarve do të mundësojë çlirimin gradual të jetës social-ekonomike. Manastirliu nuk përmendi se kur do të lehtësohen masat, si orari i lëvizjeve, por theksoi se ekspertët e Komitetit Teknik janë duke vlerësuar situatën epidemiologjike.

“Eskpertët tanë të Komitetit Teknik janë duke vlerësuar në mënyën dinamike masat, por gjithçka do të varet nga ecuria e epidemisë. Çlirimi gradual i jetës social-ekonomike duhet medoemos të shoqërohet nga masat e distancimit fizik, vendosjen e maskës dhe mbajtjen e higjienës, në mënyrë që të mos bëjmë hapa prapa dhe të vijojmë të vendosur përpara në këtë kilometër të fundit në kthimin në normalitetin aq shumë të dëshiruar.”

Në fillim të prillit, Manastirliu u shpreh se “drita në fund të tunelit po afrohet çdo ditë e më shumë” si pasojë e fushatës së vaksinimit. Në po të njëjtën kohë, në një intervistë për emisionin “Dola te Ola” në News24, ministri i Shtetit për Rindërtimin, Arben Ahmetaj, tha se vendi po shkon drejt hapjes. Sipas tij, këtë muaj Shqipëria do të hapet totalisht.

MOS I HUMBISNI