Në një intervistë për Euronews Albania në emisionin “Ilva Now” me Ilva Tare, Linda Rama, foli si bashkëshortja e Edi Ramës dhe si aktiviste e të drejtave të njeriut. E pyetur nga Ilva në lidhje me gratë në politikë, znj.Rama vlerësoi arritjet e tyre, por u shpreh se misioni i tyre nuk është shprehur mirë.

“Atyre grave që iu është dhënë mundësia për të qenë në nivelet më të larta, unë nuk i shoh këto gra, aq sa duhet në nivelin e misionit. Ato nuk janë ngritur në nivelin e misionit, ato thjesht bëjnë, mendoj unë, në një masë më të madhe, përpiqen të performojnë në punën e tyre. Është një fjalë shumë e madhe të jesh në nivelin e misionit. Duhet ta mendosh shumë thellë, duhet të të vijë nga brenda. Duhet të heqësh egon personale. Duhet të mendosh që ti aty nuk je se je më e mira. Jo, nuk janë më të mirat, ka shumë më të mira. Thjesht iu është dhënë mundësia edhe për shkak të kapaciteteve që kanë. Por janë aty sepse është investuar shumë gjatë për to.”

Në vijim, ajo tha se gratë në politikë duhet të shërbejnë si katalizator të problematikave të grave në komunitet.

“Është investuar nga nënat, nga mësuesit, nga shoqëria. Është bërë betejë e madhe këtu në vitet ’90 dhe 2000 për kuotat [e grave në politikë]. Është një evoluim [shumë i madh] që s’ka lidhje me këto vitet e fundit, është një evoluim i politikës dhe i shoqërisë shqiptare. Është një kërkesë që vjen nga brenda. Ato janë aty që të mishërojnë këtë lloj misioni. Që të jenë katalizatore të fuqizimit të gruas në baza meritokratike në të gjitha nivelet, por njëkohësisht edhe të adresimit të problematikës së gruas në komunitete.”

 “Do t’i doja që ato t’i njihnin shumë mirë problematikat e grave në komunitete,” u shpreh ajo.