Përfaqësuesit e sipërmarrjeve private, nën grupimin Unioni Turistik Shqiptar, përmes një shkrese zyrtare të drejtuar Ministrisë së Shëndetësisë dhe Komitetit Teknik të Ekspertëve, kërkojnë heqjen e masave kufizuese, pasi sipas tyre po dëmtojnë turizmin.

Unioni Turistik Shqiptar shkruan se masat po pengojnë mbarëvajtjen e sezonit veror dhe vënë në dukje pakënaqësitë te turistët. Në letrën zyrtare kërkohet që të hiqet ora policore dhe të lejohet muzika deri në fillim të mesnatës pasi orari aktual nuk i përmbull kërkesat e turistëve.

“Për shkak të moslejimit të muzikës pas orës 22:00 kemi marrë shumë ankesa nga turistët, të cilët janë të pakënaqur ngaqë nuk kanë ardhur për t’u mbyllur në dhomë, por për të pushuar dhe për t’u argëtuar. Me qëllim që turistët të marrin kënaqësinë e pushimeve, sugjerojmë që ky orar të zgjatet deri në orën 24:00 në mënyrë që të mos u shkaktohet mërzitje, pasi ora 22:00 nuk mjafton.”

Në shkresë, që mban datën 18 qershor, shkruhet se lehtësimi i masave do të ndihmojë ekonominë dhe bizneset e industrisë së turizmit.