Dua Lipa, ylli me famë botërore prej disa ditësh ndodhet në Shqipëri! Këngëtarja, e cila nuk na përgatiti për një lajm si ky, ka vizituar Tiranën bashkë me familjen e saj, të dashurin Anwar Hadid dhe disa miq. 

Siç e do tradita, ylli i muzikës pop ka vizituar kryebashkiakun Erion Veliaj në Bashkinë e Tiranës, ku gjatë bisedave shkëmbyen edhe dhuratat simbolike. 

Nisur nga çfarë tha kryetari i Bashkisë, Dua Lipa do të qëndrojë gjatë në vendin e origjinës dhe në Tiranë, aq sa do t'i duhet një targë e personalizuar për të lëvizur lirisht. 

"Dua 100"- shkruhej në targën e krijuar posaçerisht për këngëtaren, e ndërsa dhurata tjetër simbolike ishte kapelja e gruas tiranëse si dhe një disk popullor me këngët e Shqipërisë së Mesme.

Ndërsa për partnerin dhe babain e Dua-s, kryetari i dhuroi një fanellë të personalizuar nga ekipi i futbollit të Tiranës. Aty nga fundi i bisedës, Dua i dhuroi Veliajt albumin e saj të fundit "Future Nostalgia" (album i cili prej më shumë se 6 muajsh qëndron në top 10-en e Billboard 200), bashkë me një mbishkrim.

Gjatë gjithë takimit, Dua Lipa u përpoq të fliste shqip dhe çfarë s'mund të mos binte në sy ishte thjeshtësia që i vinte natyrshëm në çdo sjellje dhe falenderim. 

Përveç Veliajt, Dua Lipa u takua edhe me kryeministrin Rama, i cili nga përshkrimi që bën për këngëtaren, duket po aq i mahnitur sa të gjithë prej saj.

Ndërkohë Dua, në Instagramin e saj ka postuar një foto, në përshkrimin e së cilës ka vendosur ikonën e flamurit shqiptar. Ç'do të ndodhë në vazhdim me ardhjen e saj, mbetet një surprizë edhe më e madhe!