Organizata Botërore e Shëndetit tha se të gjitha teoritë mbi origjinën e shpërthimit të Covid-19, përfshirë mundësinë e daljes nga laboratorit, janë "në tryezë" dhe u bëri thirrje shkencëtarëve kinezë të kryejnë hetimet e tyre.
Zyrtarët e OBSH-së iu përgjigjën pyetjeve të gazetarëve pasi një raport i inteligjencës amerikane i dorëzuar në Shtëpinë e Bardhë të martën u raportua se nuk ishte përfundimtar në çështjen e origjinës së pandemisë, pjesërisht për shkak të mungesës së informacionit nga Kina.
"Situata aktuale është se të gjitha hipotezat në lidhje me origjinën e virusit janë ende në tryezë," tha Michael Ryan, kreu i programit të urgjencave shëndetësore të OBSH -së, në përgjigje të një pyetjeje në lidhje me teorinë e daljes nga laboratori.
"Disa kanë më shumë gjasa se të tjerat bazuar në analizën aktuale, por të gjitha hipotezat kërkojnë sqarime të mëtejshme dhe hetime të mëtejshme dhe ne do të shkojmë dhe do të shikojmë se ku e drejtojnë OBSH-në këto udhëzime," shtoi ai.
Vlerësimi i inteligjencës amerikane, i urdhëruar nga Joe Biden 90 ditë më parë, nuk ishte në gjendje të përmblidhte përfundimisht nëse virusi, i cili u shfaq për herë të parë në Kinën qendrore, u transmetua te njerëzit nëpërmjet kafshëve apo doli nga një strukturë kërkimore shumë e sigurt në Wuhan, thanë për Washington Post dy zyrtarë amerikanë.
Duke iu përgjigjur raporteve, zëdhënësi i ministrisë së jashtme të Kinës, Wang Wenbin, kritikoi Washington-in për "politizimin" e çështjes së gjurmimit të origjinës Covid.
"Shtetet e Bashkuara thonë se mungojnë informacionet nga Kina," tha ai në një konferencë shtypi. "Unë mund t'i them Shteteve të Bashkuara se ky është vetëm një justifikim për të mbuluar dështimin e inteligjencës në gjurmimin e origjinës."
Wang tha se raporti ishte politik dhe prandaj nuk do të nxirrte ndonjë përfundim shkencor," dhe vetëm do të shqetësonte dhe dëmtonte përpjekjet ndërkombëtare në gjetjen e origjinës së virusit dhe bashkëpunimin global kundër Covid-19".
Debati mbi origjinën e virusit, i cili ka vrarë më shumë se 4 milionë njerëz, është bërë gjithnjë e më i diskutueshëm. Kur Biden kërkoi hetimin, ai tha se agjencitë e inteligjencës amerikane ishin ndarë në dy skenarët e mundshëm - kafshët ose laboratori.
Në fillim të pandemisë, hipoteza e origjinës natyrore - pra virusi u shfaq te lakuriqët e natës, pastaj kaloi te njerëzit, ndoshta përmes një specie ndërmjetëse - u pranua gjerësisht. Por me kalimin e kohës, shkencëtarët nuk kanë gjetur një virus te lakuriqët e natës ose te një kafshë tjetër që përputhet me informacionin gjenetik të Sars-CoV-2.
Duket se ekspertët janë gjithnjë e më të gatshëm të marrin në konsideratë teorinë se virusi mund të ketë dalë nga një laborator që kryen hulumtime të koronavirusit të lakuriqëve në Wuhan.
Burimet: China News, Guardian, Washington Post
