Një skenë nga “Home Alone” u përdor për të treguar në mënyrë të thjeshtë se si funksionojnë vaksinat.

Videoja u publikua nga Shkolla e Shëndetit Publik Johns Hopkins Bloomberg – e cila është pjesë e Johns Hopkins University, një nga institucionet akademike më prestigjioze në botë – dhe tregon fuqinë e vaksinave dhe dozave përforcuese.

Videoja fillon me Kevin McCallister në “rolin” e vaksinës, i cili godet dhe rrëzon Marv, i cili është etiketuar si varianti Delta. Harry, i shënuar si Omicron, i shmanget vaksinës, por jo goditjes së dytë (dozës përforcuese).

“Mbani mend: Të qenit i vaksinuar dhe doza përforcuese është mënyra më e mirë e mbrojtjes kundër sëmundjes së rëndë nga Covid-19,” shkruan Johns Hopkins.

“Tani ka prova të qëndrueshme që Omicron po përhapet dukshëm më shpejt se varianti Delta,” tha të hënën, për Reuters, drejtori i përgjithshëm i OBSH-së, Tedros Adhanom Ghebreyesus. "Dhe ka më shumë gjasa që njerëzit e vaksinuar ose të shëruar nga Covid-19 të infektohen ose të riinfektohen.”

Ekspertët rekomandojnë që personat e pavaksinuar të bëjnë vaksinën, ndërsa ata që janë plotësisht të vaksinuar duhet të marrin parasysh dozën përforcuese për të qëndruar të mbrojtur gjithashtu.