Gjatë komunikimit të fundit publik, Komiteti i Ekspertëve vendosi të mos i ndryshojë masat aktuale që janë në fuqi për parandalimin e Covid-19. 

Zëvendëministrja e Shëndetësisë, Eugena Tomini tha se gjatë javëve të fundit në vend është shënuar piku më i lartë i infektimeve nga Covid-19 në vend. Kjo, ka ardhur si pasojë e shkujdesjes së treguar gjatë ditëve të festave, por edhe nga prania e varianteve Delta dhe Omicron. 

Pavarësisht rritjes së ndjeshme, ekspertët vendosën që masat të mos ndryshojnë, pasi efektin që pritej e kanë dhënë në mënyrë efikase deri më tani.

“Janë rritur infektimet në dy javët e fundit si pasojë e variantit Delta dhe Omicron dhe e mosrespektimit të grumbullimeve gjatë festave të fundvitit Fatmirësisht kemi qëndrueshmëri në shtrimet në spitale, nuk është reflektuar rritje e shtrimeve. Gjatë kësaj periudhë është shënuar piku më i lartë në dy vite pandemi."- u shpreh Tomini.

Në lidhje me masat, Rakacolli u kërkoi njerëzve t'i respektojnë në mënyrë rigoroze.

“Do të vijojnë të mbeten të njëjtat masa në fuqi. Apelojmë që të respektohen të gjitha masat dhe të qytetarët të vaksinohen. Mbeten në fuqi ora policore vijon me orën 23:00 – 06:00, vijon të mbetet në fuqi urdhri për lejimin e grumbullimeve deri në 50 persona dhe të aktiviteteve kulturore, sportive, etj deri në 30% të kapaciteteve të tyre me prezencë të spektatorëve."

Përsa i përket shkollave, ajo u shpreh se për momentin nuk do të ketë mbyllje të tyre, por gjithsesi kjo do të vlerësohet në bazë të dinamikës së situatës epidemiologjike.

Burimi: Abc News