Qeveria në Britaninë e Madhe është duke punuar për të krijuar një strukturë e cila do të bëjë që shumë emigrantë shqiptarë të kthehen mbrapsht nëse nuk plotësojnë kriteret e përcaktuara.

Guardian raporton se shifrat qeveritare të qarkulluara në fillim të këtij viti pretendonin se rreth 60% e emigrantëve që kalonin në Kanalin anglez (La Manche, që ndan Anglinë jugore nga Franca veriore) çdo ditë ishin nga Shqipëria, megjithëse zyrtarët vunë re se shifrat luhateshin.

Ministri i imigracionit Robert Jenrick tha të enjten se janë në shqyrtim propozimet për të vendosur në kontroll "situatën serioze".

“Ne po shqyrtojmë nëse ka një rrugë të caktuar për shqiptarët që rastet e tyre të dëgjohen shpejt dhe të largohen nga vendi nëse nuk rezulton të jenë të suksesshëm dhe të kthehen në Shqipëri,” tha Jenrick për Commons.

Më parë, në parlament është thënë se 12,000 shqiptarë kanë shkruar në Britaninë e Madhe pasi kanë kaluar Kanalin deri tani këtë vit, nga të cilët 10,000 ishin burra beqarë, të rritur. Shifra krahasohet me 50 në vitin 2020.

Jenrick tha: “Shqipëria është qartësisht një vend i sigurt dhe ata individë kanë kaluar nëpër shumë vende të tjera të sigurta përpara se të mbërrinin në Mbretërinë e Bashkuar. Disa raporte sugjerojnë se rreth 1% apo edhe 2% e popullsisë së rritur mashkullore të Shqipërisë ose kanë tentuar të largohen nga vendi në këtë mënyrë ose po mendojnë ta bëjnë. Pra, kjo është një situatë serioze që duhet ta kapërcejmë.”

Ai shtoi se zyrtarët e Mbretërisë së Bashkuar duan të punojnë me autoritetet shqiptare me shpresën për të arritur përfundimisht një marrëveshje për imigracionin.

“Ne vazhdojmë të refuzojmë hyrjen dhe do të largojmë individët që nuk kanë të drejtë të jenë në Mbretërinë e Bashkuar, siç e pret publiku me të drejtë, dhe po kërkojmë vazhdimisht mënyra të përmirësuara për të trajtuar në mënyrë efikase pretendimet e atyre që nuk e meritojnë të qëndrojnë,” tha një zyrtar i Home Office, departamenti përgjegjës për imigracionin, sigurinë, rendin dhe ligjin.