Flori Mumajesi zakonisht nuk është shumë aktiv në rrjete sociale, por kur është, sigurohet që njerëzit të ndihen nostalgjikë, si disa ditë më parë, ose të bëhen pak lëmsh, si në rastin e videos së fundit.

Kantautori publikoi një moment kur ish-kryetari i Partisë Demokratike, Lulzim Basha, thotë “me fjalë të vogla, siç thotë edhe Flori” dhe më pas u shpreh:

 “Me fjalë të vogla...siç e thotë Flori. Flori nuk e thotë më tani. Provo ta kërkosh në YouTube dhe nuk do e gjesh, fatkeqësisht. Prej tre javësh, nuk është më online, në kanalin tim zyrtar të paktën, në kanale të tjera nuk e di. Por me siguri do të fshihet dhe nga andej. Në fakt, unë i kam fshirë të gjitha këngët para tre muajsh në kanalin zyrtar, 45 vepra. Kaloi nja 2-3 javë, me erdhën nja 10 mesazhe ‘Ore, sikur s’e shoh këtë këngën’. Disa të tjerë ndiqnin links pirate,” thotë Mumajesi.

“Kurse kënga ‘Me fjalë të vogla’, kënga ‘Plas’ dhe kënga ‘Thjesht të du’ 3 javë nuk janë online në YouTube dhe së shpejti nuk do të jenë as në Spotify,” shton ai. “Këto ditë kam këtë aktivitetin e fortë, ku i zgjoj njerëzve memorien për të parë, për të vërtetuar a mungonte kënga ‘Me fjalë të vogla’ që është pikë e dobët, ‘Plas’ është pikë e dobët, ‘Thjesht të du’...janë martuar njerëzit me atë këngë, dashuri është. Sigurisht që një nga këngët që unë e kam...një nga ato që mbahet mend Flori, ‘Me sy mbyllur’, nuk është as ajo në YouTube. Gjithë këto ditë lexoja mesazhet ‘Rikthehu se bën muzikë të bukur’, ‘Na ke munguar etj etj’. Çfarë ka munguar? Cila këngë? “Ëndrra” e The Dreams? Patjetër që po, aty ka qenë. Por këto nuk janë.”

Në një moment, ngre akoma më shumë dyshime për çfarë kë ndodhur kur thotë se “muzika e tij ka vdekur”.

“Sa lexoja ‘je i pavdekshëm’ apo ‘muzika jote e pavdekshme’ etj etj, [mendoja] në fakt ka vdekur, por nuk e keni ngushëlluar. Aq sa merrja gëzim, ndriçim aq ndihesha dhe gri duke i dëshmuar vetes se duhet ta shtysh vetë, se ata nuk kanë detyrime të dëgjojnë këngët përditë. Duhet t’ua kujtosh ti. Por, as unë nuk e kam detyrim këtë gjë. Këngët më të shenjta të miat, 4 këngët mungojnë. Nuk vihen re nga dashamirësit, nga dëgjuesit, nga ata që konsumojnë muzikën. Po unë çfarë detyrimi kam? Po më duket se çdokush në vendin tim do të ndihej keq nëse 4 këngët më të shenjta...” – thotë ai.

Në fund të videos, siguron ndjekësit se është mirë.

“Tani nuk pres ngushëllime pas kësaj videoje. Mos u shqetësoni, jam shumë mirë. Mund të bëj muzikë prap. Siç e patë, sot kam postuar dhe një demo. Por, është më mirë të shkosh në fund të detit dhe të marrësh vrull, sesa të llastohesh nga disa mesazhe.”

Në komente, ndjekësit kërkojnë që këngët të rikthehen në YouTube.