A ndiheni ndonjëherë sikur nuk e meritoni suksesin tuaj, pavarësisht arritjeve dhe aftësive tuaja? Kjo ndjesi mund të jetë një simptomë e sindromës imposter. Për shumë njerëz, kjo ndjesi mund të shoqërohet me ankth social, duke krijuar një kombinim të vështirë për t'u menaxhuar. Ja çfarë duhet të dini rreth këtyre dy fenomeneve dhe si të përballeni me to.

Çfarë është sindroma imposter?

Sindroma imposter është një gjendje psikologjike ku individët ndihen si mashtrues dhe besojnë se nuk e meritojnë suksesin e tyre. Pavarësisht provave të kundërta, ata mendojnë se sukseset e tyre janë rezultat i fatit, rastësisë ose mashtrimit të të tjerëve për të menduar se janë më të aftë sesa janë në të vërtetë.

Imposter syndrome, e njohur si “mashtrim i perceptuar”, përfshin dyshim për veten dhe aftësitë personale, pavarësisht arsimimit, përvojës, talentit dhe arritjeve. Me fjalë të tjera, këta njerëz e kanë të vështirë të besojnë te vetja, nuk mendojnë se janë mjaftueshëm të mirë; dyshojnë tek inteligjenca, arritjet apo talenti i tyre.

Simptomat e sindromës imposter:

Dyshim në aftësitë personale - Pavarësisht arritjeve, personat me këtë sindromë vazhdimisht dyshojnë në aftësitë e tyre.

Frika e ekspozimit - Ata kanë frikë se në një moment do të "zbulohen" si mashtrues.

Mbivlerësimi i gabimeve dhe nënvlerësimi i arritjeve - Çdo gabim shihet si dëshmi e paaftësisë, ndërsa arritjet zvogëlohen.

Çfarë është ankthi social?

Është një gjendje ku individët përjetojnë frikë të tepruar dhe ankth në situata sociale. Kjo mund të ndikojë në aftësinë e tyre për të komunikuar me të tjerët, për të marrë pjesë në aktivitete sociale dhe për të ndjekur objektivat personale dhe profesionale.

Lidhja mes sindromës imposter dhe ankthit social:

Për shumë njerëz, këto dy gjendje përjetohen njëkohësisht. Ndjenja e të qenit një mashtrues mund të rrisë frikën e gjykimit nga të tjerët, duke përkeqësuar ankthin social. Ndërkohë, ankthi social mund të ushqejë mendimet e sindromës imposter, duke krijuar një cikël të vështirë për t'u thyer.

Si të përballeni me sindromën e imposter dhe ankthin social?

1. Pranoni ndjenjat tuaja

Kuptoni se sindroma e imposter dhe ankthi social janë të zakonshme dhe shumë njerëz përjetojnë këto ndjenja.

2. Mbani një ditar arritjesh

Shkruani arritjet tuaja dhe përpjekjet që keni bërë për t'i arritur ato. Kjo mund t'ju ndihmojë të kuptoni se sukseset tuaja janë të merituara.

3. Kërkoni mbështetje

Bisedoni me një mik të besuar, familjar ose profesionist të shëndetit mendor. Mbështetja dhe perspektiva e tyre mund t'ju ndihmojnë të shihni gjërat ndryshe.

4. Përballuni me frikën tuaj

Përpiquni të ekspozoheni gradualisht ndaj situatave sociale që ju shkaktojnë ankth. Kjo mund të ndihmojë në uljen e frikës dhe në rritjen e vetëbesimit tuaj.

5. Kujdesuni për veten

Kushtoni kohë për aktivitete që ju relaksojnë dhe ju bëjnë të ndiheni mirë. Ushtrimet fizike, meditimi dhe teknikat e frymëmarrjes mund të ndihmojnë në uljen e ankthit.

6. Rikujtoni sukseset tuaja

Bëni një listë me arritjet tuaja dhe kthehuni tek ajo kur ndiheni të pasigurt. Kjo do t'ju ndihmojë të kujtoni se keni arritur shumë dhe se meritojnë suksesin tuaj.

7. Vendosni qëllime të vogla dhe të arritshme

Kjo do t'ju ndihmojë të ndërtoni vetëbesimin dhe të ndiheni më të sigurt në aftësitë tuaja.

Sindroma imposter dhe ankthi social mund të jenë sfiduese, por me strategji të duhura mund të menaxhohen. Duke pranuar ndjenjat tuaja dhe duke kërkuar mbështetje mund të filloni të ndiheni më të sigurt në vetvete dhe të përmirësoni shëndetin tuaj mendor dhe emocional. Kujtoni se ju meritoni suksesin dhe arritjet tuaja dhe se nuk jeni vetëm në këtë rrugëtim.

Artikuj të sugjeruar: