Po shenjën tënde të horoskopit sipas një momenti ikonik të G Banit e kishe menduar ndonjëherë? Nëse jo, shiko çfarë përgatitëm ne për ty:
Dashi – G Bani i zarfeve të zinj
G Bani njihet nga gjithë publiku tashmë si një njeri mjaft pasionant, gjaknxehtë dhe pak kokëfortë, cilësi këto që i ka dhe shenja e zjarrtë e Dashit. Dhe ti si G Bani, kur paralajmëron dikë të mos të të prekë, ose përndryshe do të vuajë pasojat, nuk përton që t’i bësh fjalët e tua realitet. Zakonisht, digjesh ti në fund të gjithë kësaj, ama ty aq të bën përpara vendosjes në vend të krenarisë tënde.
Demi – G Bani në mbrojtje të Valbonës edhe pas ‘ndarjes’
G Bani ka treguar në disa raste besnikëri, kokëfortësi dhe natyrën e tij mbrojtëse brenda shtëpisë së “Big Brother”, cilësi tipike këto që i zotëron shenja e Demit. Sado të të nevrikosë dhe aktivizojë damarët e qafës personi që ti dikur e kishe aq përzemër, ti tregohesh shumë i/e drejtë kur vjen puna për t’i dalë në mbrojtje po të njëjtit person, duke treguar se zemra jote përbëhet në të vërtetë prej ari.
Binjakët – G Bani i dashuruar me Valbonën…pastaj me Danjën
Binjakët i karakterizon dualiteti i tyre që tek G Bani e kemi parë me pëlqimet e tij brenda shtëpisë. Xhibo u dashurua një herë në fillim me Valbonën, vetëm për të hequr dorë prej saj përfudimisht e për të admiruar thellësisht Danjën. Jo se dyshojmë në sinqeritetin e këtyre ndjenjave, ama si ti, dhe G Banit, ju duhet pak kohë derisa ta ndani mendjen përfundimisht se çfarë jua bën zemrën të rrahë dhe çfarë jo.
Gaforrja – G Bani i dorëzuar përballë Danjës
Si një romantik i pashpresë me një zemër të edukuar në thellësinë e saj, G Bani mishëron tiparet e personalitetit të një Gaforreje, që është në të vërtetë dhe shenja e tij e horoskopit. Kulmin e romancës, vetësakrifikimit dhe butësisë së Gaforres, G Bani e arriti atëherë kur i shprehu hapur Danjës admirimin e tij pa kërkuar asgjë në këmbim dhe duke treguar përulësi “të shpirtit dhe fizikut të tij të shëmtuar”, përballë së bukurës dhe së ëmblës Danjë.
Luani – G Bani: “Jam legjendë!”
Ashtu si shenja e Luanit, plot vetëbesim, dramatik dhe gjithmonë në qendër të vëmendjes, e tillë ishte dhe deklarata e G Banit në “Ftesë pa 5”, ku ai u shpreh se ishte legjendë dhe kjo ishte hera e parë që e thoshte me zë të lartë! Guximi dhe vendosmëria e Xhibos në atë intervistë i përngjan pikërisht veprave të kësaj sheje zjarri dhe ndonëse nga disa mund të konsiderohen si arrogantë, përshfaqje të tilla të shenjës së Luanit janë gjithmonë bindëse dhe në fakt mjaft karizmatike për njerëzit e tjerë!
Virgjëresha – G Bani: “S’jam i bullizuar se këtu janë të gjithë të vërtetë në hipokrizinë e tyre”
Sado që G Bani njihet për gjaknxehtësinë e tij, ai jo pak herë ka treguar brenda shtëpisë së “Big Brother” anën praktike që kanë Virgjëreshat për zgjidhjen e problemeve. Një shembull i kësaj ishte dhe gjykimi i ftohtë që ai ishte në gjendje t’u bënte situatave, si përgjigjja që i dha më sipër Ledionit kur u pyet prej tij nëse “ndihej i bullizuar në shtëpi”.
Peshorja – G Bani i hapur në bisedën me Eglin
Si një romantik i vërtetë, dëgjues dhe këshillues i mirë, G Bani ishte aty për Eglin kur ajo kishte nevojë, porsi Peshoret empatike të horoskopit. Si tek kjo bisedë mes tyre, edhe Peshoret janë aty për ty në momente të vështira, të fshijnë lotët teksa të thonë “Ah, të vdes unë për ty!” dhe përpiqen të të bëjnë për të qeshur me qëllimin për të të ngritur humorin.
Akrepi – G Bani që po vdes për të parë trup femre
Si Akrepët e udhëhequr tërësisht nga pasioni, edhe G Bani që lëngëzonte përballë pamjes së Valbonës, i përshtatet më së miri këtij kombinimi situatash me shenjat. Ti nga gjaknxehtësia merr ndonjëherë veprime të nxituara të cilat e kupton gjatë rrugës se janë të gabuara, ama si G Bani, ke një krenari më të madhe që s’të lejon të tërhiqesh prej misioneve të tua, herë herë dhe cenuese ndaj privatësisë së tjetrit.
Shigjetari – G Bani në habitatin e vet: Rap-in!
Si Shigjetarët aventurierë, lozonjarë dhe të rinj përgjithmonë në shpirt, i tillë erdhi dhe interpretimi i G Banit me këngën “Tirona” gjatë prime-t në Big. Kur ndërmerr aventura të tilla, edhe mund të ngatërrohesh rrugës Shigjetar, si për shembull duke harruar tekstin e këngës, ama ti e merr çdo gjë në jetë me kaq sportivitet, sa di ta nxjerrësh veten mirë në çfarëdo lloj skenari.
Bricjapi – G Bani që pranon t’i shtojë 20 mijë euro çmimit të madh menjëherë
Ashtu si Bricjapët, G Bani që sapo kryen një mision nga Vëllai i Madh, pranon mundësinë e shtimit të vlerës monetare në llogarinë e tij pa një pa dy, i përngjan kësaj shenje dhe vetëm kësaj! G Bani në këtë moment, si Bricjapët, ndjek në mënyrë të pamëshirshme suksesin, ndërmerr rreziqe dhe shikon gjithmonë për mundësinë tjetër të madhe që mund të kapë.
Ujori - G Bani në "Zonë e Lirë"
Si Ujori i çuditshëm, jashtëzakonisht i paparashikueshëm dhe gjithmonë dy hapa përpara të tjerëve, e tillë ishte intervista e G Banit në "Zonë e Lirë", vite më parë. I paraqitur me pamjen e tij misterioze, syzet e mëdha dhe sjelljen e heshtur, G Bani në atë intervistë, jep 100% energjinë e Ujorëve të pandreqshëm dhe jokompromentues të gjithë zodiakut.
Peshqit – G Bani që zbutet nga mesazhi i familjes
Ashtu si Peshqit, G Banit shpërthyes i mjafton një mesazh thirrësmendjeje nga familja që të bëhet më pas i sjellshëm, introvert dhe shumë empatik. Në fillim Peshqve, u mungojnë kufijtë e imagjinatës së shfrenuar, por mjafton një sinjal i vogël nga njerëzit që kanë afër zemrës për t'i sjellë me këmbë në tokë e për t’i bërë të reflektojnë, aq sa duke i bërë të mbyllen ndonjëherë dhe në vetvete.
Copyright Anabel.al / Ndalohet ribotimi pa lejen e redaksisë.
Artikuj të sugjeruar:
