Na falni, por jo. Dhe nëse je këtu duke lexuar këtë artikull, e dimë që do ta bësh gjithsesi.

Nëse ka diçka për të cilën mund të jemi të sinqerta, është kjo: Mos i shkruaj ish-it! As tani, as nesër, as kur të bëhet i mërzitshëm seriali që po ndjek. Sidomos jo për Shën Valentin, që është dita më absurde për të kontaktuar dikë që në teori duhet ta kesh lënë pas.

Le ta themi hapur: Një mesazh për ditëlindje mund të duket si “Uau, më rastisi të kujtohem që sot është data e lindjes tënde. Thjesht doja të thosha hej!” - edhe pse të gjithë e dimë që nuk është thjesht “hej”. Por një mesazh në Shën Valentin nuk mund të fshihet pas asnjë justifikimi. Çfarëdo që të shkruash, mesazhi i vërtetë është: “Jam në një krizë emocionale dhe më mungon tmerrësisht!”

Por e di çfarë? S’ka rëndësi çfarë them unë. Nëse do t’i shkruash, do t’i shkruash. Dhe unë jam këtu vetëm për të të ndihmuar të përballesh me realitetin e hidhur para se të turpërohesh për këtë vendim. Prandaj, para se të dërgosh atë mesazh të diskutueshëm, le të bëjmë disa pyetje:

1. Kur e ke bërë për herë të fundit këtë gabim?

Hap bisedën dhe shiko: A e ke bërë këtë lëvizje më parë? Dhe çfarë ndodhi? U bllokove? U injorove? U përgjigj shkurt? Mos lejo që historia të përsëritet.

2. Po sikur të presësh deri në ditëlindjen e tij/saj?

Nëse ke një nevojë urgjente për të dërguar një mesazh pa kuptim, të paktën zgjidh një ditë më pak dramatike. Një mesazh për ditëlindje mund të jetë një “thjesht po kontrolloja a je ende gjallë” më i besueshëm se një mesazh më 14 shkurt.

3. Pse po e bën këtë?

Jo, seriozisht. Pse? Sepse të mungon? Sepse ke nevojë për vëmendje? Sepse je i/e dehur dhe ndihesh vetëm? Nëse as vetë nuk mund t’i përgjigjesh kësaj pyetjeje pa bërë një psherëtimë të gjatë, atëherë ndoshta nuk është ide e mirë.

4. Po sikur thjesht të hapësh një aplikacion takimesh?

Nëse gjithçka që të duhet është pak vëmendje ose një njeri që të thotë “Sa e bukur je!” ose “Sa interesant je!”, bëj një llogari në ndonjë aplikacion. Të paktën do marrësh një “like” dhe jo një refuzim të hidhur nga dikush që ka vendosur të mos jetë më pjesë e jetës tënde.

5. A duhet ta zhbllokoj për t’i shkruar?

Nëse e ke bllokuar këtë person, atëherë e ke bërë për një arsye. Dhe nëse ke arritur deri këtu, mendoje pak: Nëse duhet të zhbllokosh dikë për t’i dërguar një mesazh, ndoshta është më mirë që ai mesazh të mos ekzistojë fare.

6. Po sikur të jesh vetë i/e bllokuar?

Ndalo dhe pyet veten: A ka ndonjë mundësi që ai/ajo të të ketë bllokuar? Sepse nëse e ka bërë, ky mesazh nuk do të ndryshojë asgjë. E vetmja gjë që do të ndodhë është që do të ulesh në dhomën tënde duke u ankuar me zë të lartë: “Pse më ka bllokuar?!?”

7. A e ke ruajtur numrin me një emër paralajmërues?

Nëse numri i ish-it tënd në telefonin tënd është ruajtur si “Mos e telefono”, “Katastrofë emocionale” ose “Mos u turpëro përsëri”, e ke dhënë vetë përgjigjen. Nëse e ke shkruar atë paralajmërim një herë, me siguri e ke bërë për një arsye të vlefshme.

8. A ke kaluar më parë në këtë histori?

Nëse kjo situatë po të duket e njohur, ndoshta është sepse e ke bërë tashmë një herë. Ose dy. Ose tre. Mos e torturo veten dhe njerëzit që të duan duke përsëritur të njëjtën dramë. Gjithmonë do të jetë dikush tjetër që të dërgon meme qesharake dhe mund të të sjellë patatina kur je me humor të keq.

Si përfundim: Mos i shkruaj! Por nëse do ta bësh gjithsesi, të paktën mos thuaj që nuk të paralajmëruam!