Prindërit e Irsa Muçollarit – 16-vjeçares që vrau veten një javë më parë – kanë rrëfyer disa detaje në lidhje me motivet që mund ta kenë shtyrë adoleshenten drejt aktit tragjik.
“Do më mbetet peng gjithë jetën dhe në kokën time kam vetëm [pyetjen] ‘Pse?’ Kush ma mërziti kaq shumë dhe nuk e kuptoi asnjë njeri? Ne e donim aq shumë. Unë për atë jetoja, për atë punoja! Të gjesh fëmijën kur vjen nga puna në atë gjendje…I dhashë frymë, nuk e shpëtova dot!” u shpreh e ëma e të ndjerës, Mirela Muçollari.
“Kohët e fundit, e shikoja që kishte ndryshuar sjellje, ishte pak me e mërzitur, por nuk na shkonte mendja për vajzën që mund të shkonte deri në këtë pikë. Sepse ka qenë shume e sjellshme, shumë e mirë, shumë e urtë,” tha i ati, Iliri.
Ata deklaruan se pak ditë para se të ndërronte jetë, vajza u kishte kërkuar që të ndërronte klasën.
"Para një jave i tha duke qarë mamasë që të ndërronte klasën se ata nuk mësojnë. Më tha që janë 6 orë, si do duroj çdo ditë kështu? Bëjnë si të çmendur, më tha mua. Qeshin kot, flasin kot dhe nuk më pëlqen."
“Kanë gjetur disa letra që shkruanin në anglisht për bullizimin. Në një letër tjetër shkruante ‘t’i them babait apo jo?’”, tha Iliri.
Në një intervistë tjetër për Opinion në Tv Klan, e ëma e Irsës tha:
“Na kanë thënë që ishte në orë të mësimit dhe ka ikur me lot në sy. Ka ikur me lot në sy dhe asnjë nuk më ka marrë mua në telefon si nënën e saj, që të më thoshte se ishte larguar. Dita e hënë i ka vënë kapakun çdo gjëje. Përderisa vajza ka ikur duke qarë, ka qenë shumë e mbushur. Ka qenë shtysa e fundit që atë e çoi drejt këtij veprimi.”
Irsa ka qenë kampione shahu në arsimin bazë, me dhunti në pikturë, e talentuar në gjuhët e huaja, por jo shumë sociale.
Prokuroria e Gjirokastrës vijon hetimet për të zbardhur ngjarjen tragjike. Irsa u gjet e vetëvarur në banesën e saj. Sipas burimeve të prokurorisë, dyshohet se shkaku kryesor i vendimit të saj për t’i dhënë fund jetës ka qenë bullizimi i vazhdueshëm.
Irsa ishte nxënëse e vitit të parë në gjimnazin “Siri Shapllo” dhe njihej si një vajzë e qetë me rezultate të mira. Një provë kyçe në hetim është një letër që e ndjera kishte shkruar, ku shprehte dhimbjen dhe vetminë e thellë që ndiente:
"O Zot, përse po vuaj kështu vallë? Unë jam kjo që jam dhe miqtë dhe shokët kërkoj të më respektojnë. Por ata tallen me mua. Unë ndihem kaq e vetmuar dhe e mbytur në vetminë time. Nuk më vjen turp për veshjen time. Kaq mundësi kanë prindërit e mi, babai im që kujdeset aq shumë për mua aq sa dhe mamaja. Po përse u dashka të jem kaq e veçuar? Ku të ankohem? Kujt t’i drejtohem? Kujt t’ia hap zemrën time? Tek askush nuk kam besim. Madje as tek psikologia, ndonëse jam hapur. Pse u dashka të vuaj? Vallë kjo është jeta?”
Ngjarja ka tronditur qytetin e Gjirokastrës dhe ka shtuar thirrjet për më shumë vëmendje ndaj shëndetit mendor të të rinjve.
