Fenomenet paranormale janë gjithmonë një temë që na ngacmon kureshtjen dhe ndonjëherë na lë pa shpjegim. Disa eksperienca janë thjesht ëndrra të çuditshme, por ka raste kur ndjesitë e frikshme ndodhin kur jemi zgjuar, duke na bërë të dyshojmë në realitetin tonë. Më poshtë, disa histori të vërteta që keni ndarë me Anabel.
#1 Një shtëpi me të shkuar të trishtë
“Në shtëpinë ku jeton babai im, gruaja e ish-pronarit ka ndërruar jetë pas një periudhe të vështirë mendore. Sa herë që vëllai fle atje, ka ndjesinë sikur dikush e vështron. Një natë, ai thotë se ka parë një grua me një fustan të bardhë duke u sjellë vërdallë në dhomë. Kur u përpoqa të flija unë atje, më doli në ëndërr një grua që më paralajmëroi të mos shkoja. Për aq kohë sa qëndrova, ndjeva një energji të rëndë dhe të pashpjegueshme.”
#2 Kur videot zbulojnë të pamundurën
“Një natë, motra ime po bënte një video me efekte, por ajo që ndodhi na la të tronditur. Një figurë u shfaq papritur pranë saj dhe për disa sekonda, dukej sikur po lëvizte në ajër. Pamja e saj ishte e paqartë, por të gjithë ndjemë një frikë të pashpjegueshme.”
#3 Një forcë e padukshme më ngriti nga shtrati
“Isha shtrirë në shtrat, e vetëdijshme, por me sytë mbyllur. Papritur, ndjeva sikur trupi im po ngrihej në ajër. U përpoqa të lëvizja, por nuk ndjeja dyshekun nën vete. Në atë moment, dëgjova hapat e motrës sime që po vinte drejt dhomës. Sa hapet dera, ndjeva që trupi im po ulej sërish, dhe çarçafi bëri një zhurmë sikur dikush e kishte lëvizur me forcë. Kur u ndez drita, hapa sytë e përjetova një ndjesi të frikshme që s’e kam shpjeguar dot asnjëherë.
#4 Ëndrrat që paralajmërojnë
“Një natë, pashë një ëndërr ku dy duar më mbysnin. Disa ditë më vonë, humba fëmijën sepse isha shtatzënë. Pak pas kësaj, më doli në ëndërr gjyshja ime e ndjerë. Nuk e di nëse ishte një rastësi, por ajo ndjenjë nuk më është larguar kurrë.”
#5 Një shikim nga bota tjetër
“Kur fillova të lexoja Biblën dhe u pagëzova, për disa netë me radhë ndjeva një vajzë që më shikonte teksa flija. Nuk ishte ëndërr, sepse zgjoja dhe vazhdoja ta kërkoja nëpër dhomë. Duke folur me një pastor, ai më shpjegoi se ndonjëherë, kur një person afrohet me Zotin, djalli mundohet ta trembë. Pas shumë lutjesh, ajo pamje nuk u shfaq më, por gjithçka dukej si një skenë horror, me të bardha dhe me sy të fiksuar tek unë.”
#6 Kur ëndrrat bëhen realitet
“Një natë, pashë një burrë me një buzëqeshje djallëzore që donte të më bënte keq. Mëngjesin tjetër, ndërsa po shkoja në shkollë, u përballa me një burrë që kishte të njëjtën buzëqeshje si ai në ëndrrën time. Nuk e kisha parë asnjëherë më parë dhe çuditërisht, nuk e pashë më kurrë pas asaj dite.”
#7 Zëri i panjohur në mes të natës
“Një natë, rreth orës 2-3 të mëngjesit, dëgjova një zë burri që më fliste në vesh në një gjuhë që nuk e njihja. Kjo ndodhi për shtatë muaj me radhë, derisa vendosa të shkoja në një teqe dhe një kishë. Pas kësaj, ndodhi më rrallë, por ende nuk është zhdukur plotësisht.”
#8 Nata që nuk dua ta kujtoj
“Shpesh më ndodh paraliza e gjumit, por një natë ishte ndryshe. Ndjeva sikur dhoma ishte mbushur me qindra zëra që pëshpëritnin pranë meje. Nuk mund të lëvizja as të bërtisja. Vetëm kur arrita të lëviz pak, gjithçka u zhduk. Më ndodh shpesh dhe nuk di nëse ka shpëtim nga kjo ndjesi.”
#9 Një hije e errët
“Një ditë, isha shtrirë në divan për të fjetur. Ndjeva një ‘prani’ pranë kokës sime. Kur hapa sytë, pashë një hije të zezë që tundte divanin. Në dhomë ishte edhe nëna ime, por nuk mund të bëja asnjë tingull. Më në fund, ajo vuri re se diçka nuk shkonte dhe më thirri. Në atë moment, hija u zhduk.”
#10 Kur një qen të shikon si njeri
“Ditën që më vdiq një i afërm, një qen u shfaq në oborrin tonë. Nuk e kisha parë kurrë atë qen më parë dhe as nuk dihej nga kishte ardhur. Kur u përpoqëm ta largonim, sytë e tij dhe shprehja e fytyrës më kujtonin saktësisht personin që sapo kishte ndërruar jetë. Ishte thjesht një rastësi?”
#11 Një zë që nuk ekzistonte
“Një mëngjes vere, u zgjova herët dhe shkova në tualet. Nga salloni, dëgjova zërin e vëllait tim duke më bërë një pyetje dhe u përgjigja normalisht. Por kur u ktheva në dhomë, vëllai ishte ende në gjumë. Ai u betua se nuk kishte thënë asgjë.”
#12 Çfarë ndodhi atë natë?
“Zakonisht fle me dritë të ndezur, por një natë vendosa ta fik. U zgjova papritur dhe pashë një burrë me flokë kaçurrela dhe sy të mëdhenj, si një klloun i frikshëm, që më mbante dorën mbi gojë, sikur donte të më mbyste. U përpoqa të bërtisja, por nuk munda të nxirrja asnjë tingull. Vetëm kur kuptova se ishte paralizë e gjumit, trupi im filloi të lëvizë përsëri. Ishte ora 3 e mëngjesit.”
A kanë këto histori një shpjegim logjik apo janë vërtet fenomene paranormale? Pavarësisht përgjigjes, diçka është e sigurt: disa përvoja janë aq të gjalla dhe të frikshme, saqë mbeten të paharrueshme.
