Emisioni “Jetë Shqiptare” i televizionit publik Radio Televizioni Shqiptar ka ndërprerë transmetimin prej dy muajsh pa asnjë shpjegim për publikun. Thuhet se vendimi është marrë pa asnjë paralajmërim gjithashtu edhe për bashkëautoren dhe bashkëmoderatoren e programit, Elona Jaçellari, e cila ka bërë një deklaratë në rrjetet e saj sociale.
“Sot mes nesh dua të ndaj një mesazh të rëndësishëm të shkeljes së dinjitetit tim profesional dhe njerëzor. E gjendur në situatën ku prej dy muajsh jam e papunë në rrethana nga më absurdet dhe çnjerëzoret, zgjodha të flas përballë kësaj padrejtësie, edhe pse përgjithësisht në situata të tilla zgjedh të hesht, të marr mësimin edhe të vazhdoj përpara,” nisi Jaçellari deklaratën e saj.
Gazetarja zbuloi më tej se më 31 dhjetor të vitit 2024, përmes burimeve të treta, ajo u lajmërua se drejtoresha e RTSH-së, Aurora Polo, vendosi pezullimin e menjëhershëm dhe të paparalajmëruar të emisionit të saj, “Jetë Shqiptare”.
View this post on Instagram
Jaçellari vijoi të shpjegonte se përtej këtij ‘pezullimi të padrejtë’, drejtoresha Polo i bëri dhe premtime për vijimësinë e punësimit të saj në RTSH, të cilat edhe 2 muaj pas pezullimit të 31 dhjetorit, ende nuk janë mbajtur.
Anabel kontaktoi me Elona Jaçellarin, e cila na informoi më gjerësisht lidhur me reagimin e saj publik. Gazetarja u shpreh se edhe pse emisioni “Jetë Shqiptare” ishte më i ndjekuri në të gjithë televizionin, drejtoresha e RTSH-së mori vendimin e ndërprerjes së kontratës në periudhën e rishikimit të saj, që ishte saktësisht muaji dhjetor i 2024-ës.
Ndërkohë, sipas vendimeve të Këshillit Drejtues të RTSH-së, është miratuar vendimi më 30 shtator të vitit 2024 se programacioni i televizionit duhet të vazhdojë rregullisht dhe i pandryshuar deri në muajin korrik të vitit 2025.
Gazetarja Jaçellari përmbylli komunikimin e saj me ne duke theksuar dhe një herë se beteja e saj e momentit mbetet një betejë morale, e adresuar për mbarë publikun në formë mesazhi dhe një thirrje ndaj autoriteteve të drejtësisë në vend, për të ndëshkuar pikërisht padrejtësinë e bërë ndaj saj, kolegëve dhe publikut shqiptar.
Por, kush është Aurora Polo?
Drejtoresha e përgjithshme aktuale e RTSH-së, Aurora Polo, u vendos automatikisht në pozicionin e drejtoreshës së përgjithshme, si zëvendësdrejtoresha e mëparshme e televizionit, në momentin që ish-drejtori Alfred Peza dha dorëheqjen nga posti më 6 shtator të vitit 2024.
Sipas një artikulli të publikuar më 4 shkurt të këtij viti nga ‘Prapaskena’, Aurora Polo, në kundërshtim me vendimin e Këshillit Drejtues të RTSH të vitit 2014, ka përfituar 3 milionë lekë në dhjetor 2024 si shpërblim si drejtore e Festivalit të RTSH-së. Verifikimet janë bërë nga dokumentet e siguruara nga ‘Prapaskena’, ku saktësohet se asnjë person në poste drejtuese të RTSH-së nuk mund të përfitojë honorare prej pozicionit të tij drejtues. Polo është vendosur gjithashtu nën hetim nga disa media për projekte korruptive dhe vendime në konflikt interesi.
Anabel kontaktoi me stafin drejtues të RTSH-së dhe drejtoreshën Aurora Polo, por nuk kemi marrë ende një përgjigje.
Copyright Anabel.al / Ndalohet ribotimi pa lejen e redaksisë.
