Trump: “Putini do të pranojë paqeruajtës europianë në Ukrainë pas armëpushimit”
Presidenti i SHBA-së, Donald Trump, ka thënë se udhëheqësi rus Vladimir Putin do të pranonte paqeruajtësit europianë në Ukrainë si pjesë e një marrëveshjeje të mundshme për t'i dhënë fund luftës.
Trump i bëri komentet para gazetarëve në fillim të një takimi në Shtëpinë e Bardhë me presidentin francez Emmanuel Macron në përvjetorin e tretë të pushtimit rus të Ukrainës.
"Po, ai do ta pranojë atë," tha Trump.
Është e paqartë pse Putini ka bërë këtë “lëshim” dhe ka ndryshuar mendje për forcat paqeruajtëse ndërkombëtare në Ukrainë.
Europa është e gatshme të mbështesë anëtarësimin në BE të Ukrainës
Presidenti i Këshillit Europian, Antonio Costa, deklaroi se anëtarësimi i Ukrainës në Bashkimin Europian do të ishte garancia më e rëndësishme e sigurisë për të ardhmen e vendit.
Costa po fliste në një konferencë të përbashkët shtypi me krerët e BE-së dhe kryeministrin kanadez, Justin Trudeau, në Kiev.
Presidenti ukrainas Vladimir Zelensky tha se shpreson që SHBA-ja të vazhdojë të mbështesë vendin e tij.
"Ne nuk duhet të humbasim unitetin midis Europës dhe SHBA," tha ai, duke shtuar se anëtarësimi i mundshëm i Ukrainës në NATO ose BE do të përmirësonte ndjeshëm mbrojtjen e saj territoriale.
Dhjetëra mijëra njerëz nënshkruajnë një peticion për t'i hequr shtetësinë kanadeze Elon Musk
Të paktën 170,000 njerëz kanë nënshkruar një peticion parlamentar që kërkon që Elon Musk t'i hiqet shtetësia kanadeze për shkak të rolit të tij në administratën Trump dhe përpjekjeve të tij për të "sulmuar sovranitetin e Kanadasë".
Musk ka lindur në Afrikën e Jugut, por ka nënshtetësi kanadeze përmes nënës së tij të lindur në Regina, Maye Musk. Manjati i teknologjisë është bërë ndoshta këshilltari më me ndikim i presidentit të SHBA-së, Donald Trump, i ngarkuar me shkurtimin e shpenzimeve qeveritare dhe zvogëlimin e fuqisë punëtore federale.
Fituesi i zgjedhjeve gjermane, Merz, synon të udhëheqë Europën pa SHBA-në
Pasi fitoi zgjedhjet federale gjermane të dielën, kreu i Unionit Kristian Demokrat (CDU) të qendrës së djathtë, Friedrich Merz nuk ka kohë për të festuar.
Merz foli për qasjen e tij ndaj SHBA-së, në një konferencë shtypi, një ditë pasi rezultatet treguan se ai e kishte udhëhequr partinë e tij drejt fitores me 28% të votave.
“Të gjitha sinjalet që marrim nga SHBA-ja tregojnë se interesi për Europën është dukshëm në rënie dhe gatishmëria për t'u përfshirë në Europë po pakësohet,” përfundoi Merz.
Kur u kërkua sesi kontinenti duhet t'i përgjigjet Uashingtonit, Merz përmendi se marrëdhëniet e tij të mira me një linjë të fortë të liderëve të Europës mund të ofrojnë një zgjidhje.
