Vëmë bast se ke të paktën një mikeshë që betohet për rutinën e saj të vitaminave. Mbase ka treguar me mburrje për energjinë që ka, lëkurën që i shkëlqen dhe sistemin e saj imunitar të pathyeshëm. Ndoshta ke menduar edhe vetë nëse duhet të ndjekësh të njëjtën rrugë dhe të mbushësh raftin me suplemente.

E vërteta? Nuk ka një formulë të njëjtë për të gjithë kur vjen puna te vitaminat. Po cilat janë vërtet të nevojshme dhe si ta kuptosh nëse ke mungesa? Ja çfarë duhet të dish për vitaminat më të rëndësishme për shëndetin dhe kur suplementet mund të jenë të domosdoshme.

A duhen vitaminat?

Pa diskutim, vitaminat janë të rëndësishme për organizmin. Ka 13 vitamina thelbësore: A, C, D, E, K dhe grupi i vitaminave B (B1, B2, B3, B5, B6, B7, B9 dhe B12). Nga të gjitha, disa konsiderohen më të rëndësishmet për shëndetin e përgjithshëm, si vitamina D, C dhe B. Ato ndihmojnë në forcimin e sistemit imunitar, rritjen e niveleve të energjisë dhe mbrojtjen e organizmit nga faktorët e jashtëm.

Megjithatë, vitaminat nuk duhet të vijnë gjithmonë në formë pilule. Në shumicën e rasteve, një dietë e ekuilibruar me fruta, perime, drithëra dhe peshk mund të ofrojë shumicën e mikroelementëve që trupi ka nevojë. Përveç kësaj, shmangia e ushqimeve të përpunuara dhe mishit të kuq mund të përmirësojë ndjeshëm cilësinë e ushqyerjes.

Sigurisht, ka disa përjashtime. Disa grupe njerëzish janë më të prirur ndaj mungesave ushqimore dhe mund të kenë nevojë për suplemente:

Vegjetarianët dhe veganët shpesh kanë mungesë të vitaminës B12 dhe hekurit.

Ata që nuk marrin mjaftueshëm diell mund të kenë mungesë të vitaminës D.

Të rriturit në moshë kanë më pak aftësi për të përthithur lëndët ushqyese.

Ata që vuajnë nga probleme me tretjen mund të kenë vështirësi në përthithjen e vitaminave dhe mineraleve.

Gratë shtatzëna kanë nevoja më të larta ushqimore për të mbështetur zhvillimin e foshnjës.

Si ta kuptosh nëse ke mungesë vitaminash?

Analizat e gjakut janë mënyra më e sigurt për të zbuluar mungesat ushqimore, por ka edhe disa shenja që mund të tregojnë se diçka mungon në organizëm:

Vitamina B12: Mpirje në këmbë dhe duar, probleme me ekuilibrin, lodhje, dobësi, gjuhë e enjtur, probleme me kujtesën.

Vitamina D: Lodhje, dhimbje kockash, ndryshime të humorit.

Kaliumi: Kapsllëk dhe rrahje të çrregullta zemre.

Hekuri: Lodhje, duar dhe këmbë të ftohta, thonj të brishtë.

Acidi folik: Lodhje, nervozizëm, diarre, rritje e ngadaltë, gjuhë e lëmuar.

Magnezi: Humbje oreksi, të përziera, lodhje, dobësi.

Nëse dyshon për ndonjë nga këto mungesa, është mirë të këshillohesh me një mjek për të përcaktuar nëse ke nevojë për suplemente apo nëse mund t’i marrësh vitaminat përmes ushqimit. Në fund të fundit, një dietë e pasur dhe e larmishme është shpesh mënyra më e mirë për të mbajtur trupin në formë të shkëlqyer.

Burimi: Popsugar

Artikuj të sugjeruar: