Dikur, sapo dikush mbërrinte në moshën e pensionit, automatikisht bëhej pjesë e një “klubi ekskluziv” - një klubi ku përfshiheshin thurja, qëndisja dhe qepja si aktivitete që supozohej të bëheshin vetëm pasi të kaloje një farë moshe. Por sot? Këto hobi më në fund po marrin vëmendjen që meritojnë, pavarësisht moshës.

Shumë krijues përmbajtjeje po ndajnë me krenari hobit e tyre “të gjysheve”. Një video virale e Alex James tregon të gjitha trikot që ka thurur gjatë vitit 2024. “Ndoshta më në fund do të provoj të thur një triko,” shkruan një komentues. Në një tjetër video, një vajzë ndan modelin e saj më të pëlqyer të qëndisjes, ndërsa rrjeti është mbushur me video për fermentimin e brumit për bukën e shtëpisë apo këshilla për fillestarët në kopshtari.

Por pse të rinjtë po orientohen kaq shumë drejt hobive që dikur konsideroheshin si të brezave më të vjetër?

Një nga arsyet kryesore është lodhja nga ekranet. Pas vitesh të tëra me telefonin në dorë dhe “doomscrolling” nëpër lajme të këqija, shumë po kërkojnë diçka më të ngadaltë dhe më të qetë. Hobit si thurja, qëndisja apo kopshtaria ofrojnë një mënyrë për t’u shkëputur nga bota digjitale dhe për të krijuar diçka me duart e veta – qoftë një triko e ngrohtë, një domate e pjekur apo një bukë me kore të përsosur.

Përveç shkëputjes nga teknologjia, “hobit e gjysheve” janë gjithashtu një formë kujdesi për veten. Një pjesë e mirë e të rinjve nuk kanë asnjë hobi dhe këto aktivitete janë një mënyrë e thjeshtë për të gjetur një pasion të ri. Për më tepër, ndikimi pozitiv në shëndetin mendor është i pamohueshëm. Një tjetër aspekt interesant i ringjalljes së këtyre hobive është ana sociale. Dikur të konsideruara si aktivitete individuale, tani po kthehen në mënyra për të krijuar komunitet. Ata që janë tashmë në “epokën e gjysheve” po lidhen me njerëz të tjerë që ndajnë të njëjtin pasion. Po organizohen festa, mbrëmje lojërash dhe klube gatimi.

Në fund të ditës, ky trend është një mënyrë për të gjetur sërish gëzimin në jetën e përditshme. Në një realitet të mbushur me pasiguri dhe sfida, të krijosh diçka me duart e tua mund të të bëjë të ndihesh më në kontroll. Kështu që, nëse ke menduar të mësosh të qepësh ose ke parë video për fermentimin e brumit, merr këtë si një shenjë për të filluar. Mendja dhe raporti i kohës së kaluar para ekranit do të të falënderojnë!

Burime: Pop Sugar