Disa biseda janë thjesht të sikletshme. Nuk ka rëndësi sa i sjellshëm je apo sa e gjen fjalën e duhur, do të jetë gjithsesi e pakëndshme t’i thuash dikujt që nuk mban erë të mirë, që flokët i ka shumë të yndyrshëm apo që i duken mbathjet kur përkulet. Po si t’ia dalësh pa e bërë situatën edhe më dramatike?

Mos u nxitoni

Sado që të duket e bezdisshme, ndonjëherë është më mirë të mos flasësh fare. Nëse problemi nuk të shqetëson drejtpërdrejt ose nuk po ndikon në jetën e personit tjetër, ndoshta s’ka nevojë të ndërhysh. Në rastet kur situata përsëritet shpesh dhe po kthehet në problem të vërtetë, atëherë mund ta mendosh ndryshe.

Për shembull, nëse është thjesht një rast i izoluar - si një ditë kur dikush s’ka arritur të lajë flokët - nuk ka pse ta bësh dramatike. Por nëse po ndodh shpesh dhe po krijon një situatë të pakëndshme për të gjithë, ndoshta është koha të hapësh një bisedë.

Gjeje momentin dhe vendin e duhur

Një lajm i tillë nuk duhet komunikuar kurrsesi në një mbledhje, në mes të një grupi njerëzish apo në një festë. Bisedat e sikletshme duhen bërë privatisht dhe në një moment kur as ti dhe as ai/ajo nuk jeni të shpërqendruar apo të stresuar.

Dhe më e rëndësishmja: Mos thuaj kurrë që “të tjerët më kanë thënë se…” Sepse në atë moment, gjithçka që personi do të mendojë është: “Kush e tha? Sa njerëz po flasin për mua?” dhe do të përqendrohet tek kjo, jo tek çfarë po i thua.

Thuaje qartë, shkurt dhe me takt

Kur flet për tema të sikletshme, është e rëndësishme të mos i sillesh rrotull fjalëve aq shumë sa të mos kuptohet fare mesazhi. Në vend që të fillosh me “Nuk e di si ta them këtë, por…”, bëje sa më të drejtpërdrejtë dhe të natyrshme. Për shembull:

• “Nuk e di nëse e ke vënë re, por sot ndjej një aromë të çuditshme dhe mendoj se mund të vijë prej teje.”

• “Më duket sikur nuk po ndihesh mirë kohët e fundit, por vura re që ke ndryshuar mënyrën si kujdesesh për veten. Ka ndonjë arsye?”

Nëse bëhet fjalë për një koleg që veshje nuk i përshtaten vendit të punës, mund të thuash:

• “Ndoshta s’e ke menduar, por mendoj se veshja jote mund të ndikojë te mënyra si të shohin të tjerët profesionalisht.”

Gjithmonë mbaje tonin miqësor dhe mos e bëj të ndihet keq më shumë seç duhet.

Jepi hapësirë të reagojë

Kur i thuhet dikujt diçka e sikletshme, shpesh reagimi i parë është mohimi, mbrojtja apo shmangia e temës. Nëse ndodh kjo, mos e humb qetësinë dhe mos e zgjas shumë debatin. Nëse personi ka një arsye të vlefshme - për shembull, një problem shëndetësor - dëgjoje me vëmendje. Nëse jo, ndonjëherë është më mirë të mos debatosh dhe t’i japësh kohë të reflektojë vetë.

Po sikur dikush të ta thotë ty?

Nëse je në anën tjetër dhe dikush të thotë që diçka s’po shkon me higjienën apo pamjen tënde, është normale të ndihesh në siklet, i lënduar apo edhe i zemëruar. Por në vend që të reagosh menjëherë, merr pak kohë për ta përpunuar. Nëse ndihesh keq, largohu pak, merr frymë thellë, pi një çaj dhe rikthehu në bisedë me një mendje të qetë.

Nëse e mendon dhe kupton që personi ka të drejtë, mund të thuash thjesht: “Faleminderit që më tregove.” Nëse nuk je dakord, të paktën e ke shmangur një debat të panevojshëm.

Në fund të ditës, qëllimi i këtyre bisedave nuk është të vësh dikë në siklet, por të ndihmosh pa e bërë situatën më të keqe seç është. Prandaj, bëje me takt, me mirëkuptim dhe mbi të gjitha, vetëm kur është vërtet e nevojshme.