“Administrata Amerikane e Ushqimit dhe Barnave” (FDA) ka urdhëruar tërheqjen nga tregu të disa kremrave të njohur të prodhuar nga L’Oréal dhe Walgreens, pasi testimet zbuluan nivele të larta të benzenit - një substancë e njohur për rrezikun e shkaktimit të kancerit.

A duhet të shqetësoheni?

Edhe pse produktet do të hiqen nga raftet e dyqaneve dhe platformat online, FDA ka sqaruar se konsumatorët nuk kanë nevojë t’i kthejnë ato, pasi rreziku i zhvillimit të kancerit nga përdorimi i tyre konsiderohet “shumë i ulët”.

Benzeni është një kimikat i klasifikuar si kancerogjen dhe është i lidhur me disa lloje të kancerit, përfshirë leukeminë dhe çrregullime të tjera të gjakut. Kjo tërheqje vjen menjëherë pas një tjetër rasti ku FDA urdhëroi heqjen nga tregu të një trajtimi kundër akneve nga L’Oréal për të njëjtën arsye.

Çfarë përmbajnë këto produkte?

Produktet në fjalë përmbajnë benzoyl-peroxide, një përbërës i zakonshëm në trajtimet kundër akneve, i cili ndihmon në uljen e baktereve në lëkurë. Ky përbërës gjendet si në kremra të lirë në treg ashtu edhe në receta mjekësore.

Ndërkohë që autoritetet kanë filluar heqjen e produkteve nga shitja, mbetet për t’u parë nëse do të ketë masa shtesë për të mbrojtur konsumatorët nga ekspozimi afatgjatë ndaj kimikateve të dëmshme.

Burime: DailyMail