Ushqimet ultra të përpunuara shpesh janë lidhur me probleme të ndryshme shëndetësore, disa serioze, si sëmundjet kardiovaskulare, kanceri dhe diabeti i tipit 2. Megjithatë, ka disa që, sidomos kur i blejmë në formë të standardizuar, mund të mendojmë se i janë nënshtruar përpunimit intensiv, por në realitet ruajnë formën e tyre natyrale, në një masë të madhe, po ashtu, ruajnë edhe përfitimet që i ofrojnë trupit tonë. Janë të shijshme, të dobishme dhe mund t'i shtohen vakteve të ndryshme.
Cilat janë ushqimet që duken të pashëndetshme, por nuk janë të tilla:
Maya Vadiveloo, PhD, RD, dietologe dhe epidemiologe ushqimore, i paraqet ato në një artikull të ri në revistën “Self”.
Fasulet e konservuara: Kur nuk shoqërohen me përbërës dhe erëza të tjera, ato janë një shtesë ushqyese për vaktet si sallatat, makaronat dhe supat, një burim i mirë fibrash dhe proteinash.
Perime turshi të konservuara ose në kavanozë: Ato shpesh paketohen të freskëta, që do të thotë se ruajnë shumë nga vlerat e tyre ushqyese. Konsumohen në mënyrë ideale në sallata apo burger. Për të kufizuar konsumin e natriumit, duhet t’i shpëlajmë para se t'i konsumojmë.
Perimet e ngrira: Ato futen në ngrirje sa janë të freskëta, gjë që ruan edhe vlerat e tyre ushqyese, dhe janë shumë të lehta për t'u gatuar. Mund t'i përdorim në supa, gjellë me oriz dhe receta të tjera të panumërta, në varësi të perimeve dhe formës në të cilën është ngrirë.
Frutat e konservuara: Ato janë të përpunuara, por jo të përpunuara tepër dhe mund të përmbajnë fibra, antioksidantë dhe vitamina, ashtu si versioni i tyre i freskët. Megjithatë, është mirë të zgjidhni një produkt që ruhet në ujë ose lëng 100% natyral dhe jo në shurup, sepse ky i fundit është i pasur me ëmbëlsues. I konsumojmë me tërshërë, kos apo edhe në ëmbëlsira.
Peshku i konservuar dhe ushqimet e detit: Tregu tani ofron shumë më tepër zgjedhje sesa toni i konservuar, si p.sh kallamarët. Ne preferojmë produktet e ruajtura në ujë ose vaj, të pasura me acide yndyrore omega-3, të njohura ndër të tjera për efektin e tyre mbrojtës në shëndetin e trurit.
Buka: Nuk i referohemi, natyrisht, bukës tradicionale, por versioneve të standardizuara të saj, të cilat mund të konsiderohen të pa përpunuara, përderisa nuk janë të stërmbushura me konservues dhe aditivë të tjerë. Sigurisht, ne preferojmë opsionet e drithërave të plota, të cilat janë të pasura me fibra, vitamina dhe minerale.
Djathi: Përpunimi i tij, si në rastin e turshive, bëhet nga natyra, nëpërmjet procesit të fermentimit, prandaj nuk bën pjesë në kategorinë e djathrave të mbipërpunuar, me përjashtim të disa djathrave artificialë dhe atyre të modifikuar, p.sh. për të hequr yndyrën e tyre. Në çdo rast, kontrollojmë paketimin për të parë se si janë përpunuar.
Kosi: Kur bëhet fjalë për një produkt të krijuar në mënyrë natyrale, ne e konsumojmë atë pa frikë. Situata bëhet më e ndërlikuar, megjithatë, në produktet e etiketuara "me pak sheqer" ose "pa sheqer", ku mund të jenë shtuar ëmbëlsues të tillë si stevia. Një kos tradicional ofron të gjitha përfitimet si kalcium, proteina dhe probiotikë, pra mikroorganizma të dobishëm për shëndetin e sistemit gastrointestinal dhe më gjerë.
Frutat e thata: Në formën e tyre më natyrale, ato nuk janë asgjë më shumë se sa kuptojmë nga emri i tyre, përkatësisht fruta të cilave u është hequr lagështia. Sidoqoftë, ne shmangim produktet me sheqer të shtuar – gjë që mund të mos i bëjë ato të super-përpunuara, por sigurisht që i bëjnë ato më pak të shëndetshme. I shijojmë të thjeshta ose të kombinuara në një shumëllojshmëri recetash, si me kos, tërshërë, madje edhe në sallata.
Burimi: Marie Claire
