Nëse do të mendonim për çdo program që ndjek rregullat e industrisë televizive apo të rrjeteve sociale, "The Dalina Show" do të konsiderohej dështim. Njerëzit (përfshirë edhe unë) e duan dramën, skandalet dhe VIP-at që përplasen me njëri-tjetrin. Dhe pikërisht këto janë elementet që ky program refuzon të ofrojë. Dalina Buzi ka vendosur të mos ndjekë asnjë nga rregullat që kërkon industria dhe dukshëm po zgjedh të bëjë “gabime” me qëllim.

Gabimi 1: Nuk ka skandale 

Në një treg ku drama është mbret, ku përplasjet, sherret dhe episodet që krijojnë tension janë të domosdoshme për të mbajtur audiencën të angazhuar, "The Dalina Show" është në kundërshtim. Ky do të ishte një gabim i madh në çdo emision që do të synonte klikime të shumta dhe viralitet.

Në fillim, mund të duket si një mangësi – nuk ka rrëfime shokuese nga VIP-at, nuk ka përplasje dramatike në studio, nuk ka tituj bombastikë për të tërhequr vëmendjen në rrjete sociale. Por pikërisht kjo zgjedhje e bën të rëndësishëm. Është një program që nuk ka frikë të jetë i thjeshtë, por me peshë të vërtetë emocionale (terapia live, rrëfimet për ankthin, divorci, depresioni).

E keqja e show-ve tradicionale është se shpesh mbështeten në skandale dhe përplasje që në thelb janë të zbrazëta dhe nuk mbartin asnjë mesazh. "The Dalina Show" refuzon këtë logjikë dhe i jep më shumë vlerë autenticitetit, që është diçka e rrallë në një botë televizive ku shpesh gjithçka bëhet për klikime.

Gabimi 2: Nuk është për të gjithë

"The Dalina Show" nuk është një program për ata që kërkojnë argëtim apo shfaqje sipërfaqësore. Përmbajtja është e thellë, shpesh me tema delikate (raporti me prindërit, vdekjen, ankthin) dhe kërkon një audiencë që vlerëson bisedat e hapura dhe të ndershme.

Programi nuk ka një format të qartë që ndjek rregulla dhe kjo mund të krijojë konfuzion tek disa shikues që janë mësuar me struktura standarde dhe intervista klasike. Por ky "gabim" është edhe një forcë e programit, duke tërhequr një audiencë më të pjekur, që vlerëson më shumë thellësinë e bisedave sesa spektaklin. Ky është një program që fton ata që janë të gatshëm për të dëgjuar, për të reflektuar dhe për të mësuar diçka të re.

Gabimi 3: Nuk ka “yje”

Në një treg ku shumica e emisioneve janë ndërtuar rreth personazheve të njohur (përfshirë edhe ata që janë të famshëm pa asnjë meritë apo kontribut), "The Dalina Show" zgjedh të vendosë në qendër njerëzit e zakonshëm. Duhet thënë që nuk është hera e parë që njerëzit e thjeshtë ftohen për të treguar "problemet dhe sfidat e tyre", por është ndoshta hera e parë që ata trajtohen me vërtetësi dhe respekt. Nuk ftohen për t'u shfrytëzuar për klikime, nuk përdoren si material për meme, por për të ndarë historitë e tyre në mënyrë të sinqertë dhe njerëzore. Ky është një podkast për ata që zakonisht nuk marrin vëmendje, por që e meritojnë vëmendjen më shumë se kushdo.

Shtojcë: Në program do të ketë vazhdimisht biseda me të personazhe të njohur, si rasti i Alban Dudushit, por nisur nga intervista me këtë të fundit, bisedat me VIP-at do të jenë përtej atyre intervistave klishe me qëllim klikimet në vetveve.

Gabimi 4: Nuk është perfekt

....dhe nuk synon të jetë. Ndriçimi mund të ishte më i fortë, ambienti vizual të dukej më i rafinuar, detajet në studio të ishin si të atyre studiove të kuruara. Por, Dalina dhe ekipi i saj nuk kanë frikë të shfaqin një program të pastruar nga çdo gjë që mund të duket artificiale.

Ata nuk kanë problem që të jenë të pakuruar deri në detaje, për të treguar diçka të vërtetë dhe të natyrshme, që vjen nga ndjeshmëria e të ftuarve që kanë një histori për të treguar. Ky është një gabim që është bërë me qëllim – për të krijuar një program që ka më shumë vlerë sesa “përsosmëri”.

Përfundimi: Gabime të qëllimshme

Në një treg ku gjithçka bëhet për të qenë bombastike, ndoshta një program i tillë na duhej më shumë së kurrë. Nëse "The Dalina Show" do të ndiqte rregullat klasike, do të ishte i ndërtuar për të tërhequr masat. Por atëherë nuk do të ishte ai që është – një hapësirë ku njerëzit flasin siç janë, jo siç duam t’i shohim.