Trump njofton 10% tarifa reciproke globale dhe 20% për BE-në
Presidenti i SHBA-ve, Donald Trump, zbuloi tarifat reciproke në atë që e quajti "Dita e Çlirimit", duke vendosur një tarifë minimale prej 10% për të gjitha vendet dhe taksa shtesë për rreth 60 kombe të ndryshme.
Gjatë fjalimit të tij, Trump shfaqi një tabelë ku renditeshin vendet që i nënshtrohen tarifave më të larta, me Kinën, Bashkimin Europian dhe Vietnamin që përballen me norma përkatësisht 34%, 20% dhe 46%. Kombet e tjera, duke përfshirë Japoninë, Korenë e Jugut, Indinë dhe Tajvanin, do të preken nga taksat e importit prej 24%, 25%, 26%, 49% dhe 32%, respektivisht.
Trump planifikon të krijojë “’TikTok America”
Presidenti i SHBA-ve, Donald Trump, thuhet se ka një propozim për të krijuar një kompani të re të quajtur "TikTok America".
Në vend që platforma të zotërohet nga kompani të ndryshme, ajo do të përbëhet kryesisht nga investitorë amerikanë, si dhe ByteDance që zotëron aksione, sipas planit.
Trump tashmë po shqyrton propozimet e fundit që i janë dërguar Shtëpisë së Bardhë për shitjen e platformës në SHBA, me shumë të interesuar për të blerë TikTok.
Të paktën katër të vrarë në sulmet ruse në vendlindjen e Zelensky-t
Të paktën katër persona kanë vdekur në qytetin ukrainas të Kryvyi Rih, në rajonin Dnipropetrovsk, pasi Rusia nisi një sulm me raketa balistike të mërkurën në mbrëmje.
Kreu i administratës ushtarake të qytetit, Oleksandr Vilkul, njoftoi se një zjarr i madh shpërtheu pas sulmit, i cili gjithashtu dëmtoi infrastrukturën civile.
Guvernatori shtoi se 14 persona u plagosën, duke përfshirë një djalë tetë vjeçar dhe një vajzë gjashtë vjeçare. Kryvyi Rih është vendlindja e presidentit ukrainas, Volodymyr Zelensky, dhe shtrihet rreth 70 kilometra nga vija më e afërt e frontit. Ajo ka qenë shpesh në shënjestër të sulmeve ruse që nga pushtimi i plotë i Ukrainës në vitin 2022.
Shkon në 3 mijë numri i viktimave në Miamar
Numri i të vdekurve nga tërmeti shkatërrues në Mianmar është rritur në 3,003, ndërsa 351 të tjerë rezultojnë të zhdukur. Ekipet e kërkim-shpëtimit vijojnë të kërkojnë nëpër rrënoja, por puna e tyre është vështirësuar për shkak të kushteve të motit.
“Po bie shi dhe ka ende shumë të zhdukur. Në Mandalay, veçanërisht, nëse fillon të bjerë shi, njerëzit që janë nën rrënoja do të vdesin edhe nëse kanë mbijetuar deri në këtë pikë.", tha një punonjës i ndihmës në Mianmar.
Shirat sezonalë shtojnë sfidat me të cilat përballen grupet e ndihmës dhe shpëtimit, të cilat kanë bërë thirrje për qasje në të gjitha zonat e prekura, pavarësisht nga grindjet e luftës civile.
