Një zjarr masiv përfshiu strehën e maceve “Happy Cat Sanctuar" në Medford, Long Island, duke marrë jetën e rreth 100 maceve dhe një personi, sipas konfirmimeve të policisë së Suffolk County. Viktima nuk është identifikuar zyrtarisht, por banorët e zonës pohojnë se pronari i strehës, Chris Arsenault, u pa duke hyrë e dalë nga ndërtesa në përpjekje për të shpëtuar kafshët e tij.
Në momentin e tragjedisë, në strehë ndodheshin mbi 300 mace, të shpëtuara nga abuzimi, neglizhenca dhe situata të rënda të grumbullimit të kafshëve. Zjarri shpërtheu rreth orës 07:15 të mëngjesit të së hënës, dhe ndërsa hetimet vazhdojnë për të përcaktuar shkakun, raportimet nga "ABC7 Eyewitness News" sugjerojnë se Arsenault humbi jetën duke u përpjekur të shpëtonte kafshët që kishte përkushtuar jetën e tij t’i mbante të sigurta.
Dëshmitarët thanë se Arsenault nuk ndaloi asnjë moment së shpëtuari macet e tij. “Ai vazhdonte të hynte e të dilte nga shtëpia për t’i nxjerrë jashtë, derisa në një moment nuk doli më,” tha një nga vullnetaret e “Happy Cat Sanctuary”, Lisa Jaeger.
Pavarësisht tragjedisë, rreth 150 mace arritën të mbijetonin nën strukturat e ndërtuara nga Arsenault dhe mendohet që ato të jenë të sigurta. “Chris ia kushtoi jetën shpëtimit dhe kujdesit për qindra mace,” u shpreh Frank Floridia nga “Strong Island Animal Rescue League”.
Historia e Arsenault me shpëtimin e maceve nisi pas një tragjedie personale. Në vitin 2006, ai humbi djalin e tij 24-vjeçar, Eric, në një aksident tragjik me motor. Pas këtij momenti të rëndë, ai rastisi mbi 30 kotele të sëmura dhe vendosi t’i ndihmonte. Kjo përvojë e bëri të kuptonte se shpëtimi i maceve ishte misioni i tij në jetë, duke çuar në krijimin e “Happy Cat Sanctuary”.
Tragjedia që preku këtë strehë ka tronditur komunitetin e kafshëdashësve, ndërsa shumë njerëz shprehin dhimbjen dhe mirënjohjen për sakrificën e jashtëzakonshme të Arsenault.
