Në një eksperiment të ri, shkencëtarët kanë "zbuluar" një ngjyrë krejt të re, një ngjyrë që ata thonë se nuk është parë kurrë më parë. E quajtur "olo", ngjyra përshkruhet si një blu-jeshile e fortë që qëndron jashtë kufijve të zakonshëm të asaj që syri i njeriut mund të shohë.

Studimi, i botuar në revistën Science Advances, përshkruan se një ekip studiuesish nga Universiteti i Kalifornisë, Berkeley, dhe Universiteti i Uashingtonit janë pionierë të një teknologjie të re të quajtur Oz. Kjo risi i lejon shkencëtarët të stimulojnë qelizat fotoreceptore në retinën e njeriut duke përdorur dritën lazer.

Syri i njeriut zakonisht sheh ngjyrat duke kombinuar sinjale nga tre lloje të qelizave konike - konet S, M dhe L - secila e ndjeshme ndaj dritës blu, jeshile dhe të kuqe. Normalisht, drita që aktivizon një lloj koni do të aktivizojë edhe të tjerët, gjë që kufizon gamën e ngjyrave që mund të perceptojmë.

Sistemi Oz, megjithatë, e thyen këtë rregull duke aktivizuar vetëm konet M (të ndjeshme ndaj ngjyrës së gjelbër) me dritë lazer, duke i lënë konet S dhe L të paprekur. Kjo gjë e bën njeriun të shohë një ngjyrë që nuk ekziston në natyrë.

“Duke aktivizuar vetëm konet M, ne nxorëm një ngjyrë përtej gamës natyrale njerëzore,” shkruan studiuesit. Ata e përshkruajnë ngjyrën si një blu-jeshile shumë të ndezur.

Ekipi beson se Oz një ditë mund të ndihmojë në përmirësimin e mjeteve për studimin e verbërisë së ngjyrave ose të çojë në teknologji të reja për krijimin e ngjyrave në imazhet dixhitale.