Pas një mungese prej gati një dekade, Halle Berry u rikthye në Met Gala dhe diti si të tërhiqte vëmendjen.

Ajo u shfaq me një fustan transparent të krijuar nga LaQuan Smith. Aktorja mori pjesë për herë të fundit në eventin e famshëm në vitin 2017.

Për këtë rikthim, Berry zgjodhi një veshje të personalizuar që përputhej me kodin e veshjes “Tailored For You” – një fustan me vija të qëndisura me rruaza dhe një bisht të gjatë deri në tokë, i shoqëruar nga një xhaketë e shkurtër elegante. Ajo kompletoi pamjen me një kapelë me rrjetë nga Jennifer Behr dhe bizhuteri Cartier me diamante.

Flokët e aktores ishin të kapur topuz, ndërsa grimi përqendrohej te sytë smokey dhe buzët në nuancë nude, një kombinim klasik dhe i sofistikuar.

Dizajneri LaQuan Smith e përshkroi veshjen si një përzierje “mes një vajze seksi à la James Bond dhe elegancës së epokës Harlem Renaissance”, kjo e fundit një lëvizje kulturore, sociale dhe artistike që lulëzoi gjatë viteve 1920 në lagjen Harlem të New York-ut dhe përfaqësoi një shpërthim të jashtëzakonshëm të krijimtarisë nga komuniteti afrikano-amerikan.

Tema e Met Gala për vitin 2025 ishte “Superfine: Tailoring Black Style”, frymëzuar nga libri “Slaves to Fashion” i Monica Miller dhe nderon historinë dhe ndikimin e stilit të komunitetit afro-amerikan.

Dizajneri u shpreh se veshja përçoi në mënyrë të përkryer mesazhin e temës së Met Gala-s: guxim përmes stilit.

Artikuj të sugjeruar: