Më pak rroba, më shumë zgjedhje! Kjo është filozofia e garderobës kapsulë, një qasje inteligjente ndaj stilit që i përgjigjet ritmit të shpejtë të jetës moderne. Vera, me temperaturat e larta dhe itinerarin e ngjeshur mes punës, pushimeve dhe eventeve, është koha ideale për të investuar në një gardërobë që ofron thjeshtësi, funksionalitet dhe stil.

Çfarë është një garderobë kapsulë?

Është një koleksion i vogël, i kuruar me kujdes, me veshje të thjeshta dhe të kombinueshme. Në vend të sasisë, fokusi është te cilësia, prakticiteti dhe shprehja e stilit personal.

Si ta krijosh?

1. Fillo me një seleksionim

Shiko çfarë vesh realisht çdo verë. Mbaj vetëm ato që të përshtaten, që ndihesh mirë me to dhe që kanë potencial kombinimi.

2. Zgjidh një paletë ngjyrash

Bazohu në tonet neutrale si e bardha, bezha, e zeza dhe bluja. Shto disa ngjyra që të përfaqësojnë, si portokalli, vjollca ose jeshilja.

3. Investoni në veshje bazike

Këmishë e bardhë lino/pambuku

E përshtatshme për plazh, punë apo dalje pasditeve.

Bluza bazike

Bluzat pa mëngë, me mëngë të shkurtra apo modele të thjeshta në pambuk cilësor janë të pandashme. Kombinohen me gjithçka.

Pantallona të shkurtra & të gjata linoje/pambuku

Modele me bel të lartë dhe ngjyra neutrale janë çelësi për rehati dhe stil të përhershëm.

Fustane midi

Të lehta, të përshtatshme për ditën dhe natën. Në nuance pastel, me detaje si pika apo lule të vogla, për një pamje të butë dhe femërore.

Këpucë praktike & elegante

Sandale neutrale për çdo ditë, si dhe një palë me takë për mbrëmje.

Kapelë dhe syze dielli

Për mbrojtje dhe stil. Kapele kashte dhe syzet “cat eye” janë kombinimi fitues.

Çanta funksionale

Një çantë e madhe për ditët aktive dhe një çantë e vogël elegante për darka dhe dalje.

Bizhuteri që bien në sy

Një miks mes bizhuterive të arit dhe atyre të argjendit për të luajtur me kontraste dhe për të kompletuar çdo pamje.

Cilësia mbi gjithçka

Zgjidh pëlhura natyrale si linoja, pambuku dhe viskoza. Ato janë të freskëta dhe duken më bukur me kalimin e kohës.

Rezultati? Më pak kohë para garderobës, më shumë stil gjatë verës.

Me një gardërobë kapsulë, ndihesh gjithmonë e veshur bukur, qoftë në darkë në qytet, në një plazh mesdhetar apo në një udhëtim spontan. Sekreti nuk është të kesh shumë, por të kesh atë që të nevojitet dhe të dish si ta veshësh.

Burimi: Marie Claire