Madonna, 67 vjeç, dha një nga intervistat më të ndjera të jetës së saj në podcast-in On Purpose të Jay Shetty-t, duke reflektuar mbi udhëtimin e saj shpirtëror, përvojat e vështira që ka kaluar dhe fuqinë e faljes.
Ajo rrëfeu se lidhja me spirtualitetin nisi pak para lindjes së vajzës së saj të parë, Lourdes Leon, në vitin 1996, kur u njoh me mësimet e Kabalah. Prej atëherë, spiritualiteti është bërë thelbësor në jetën dhe artin e saj.
“Duhet të kesh një jetë spirtuale për të pasur sukses. Suksesi nuk është fama apo paratë, por të jetosh me kuptim. Nëse nuk do ta kisha këtë lidhje me spirtualitetin, nuk do të isha këtu sot,” – tha ajo.
Fituesja e çmimeve Grammy, e njohur për angazhimin e saj në të drejtat e njeriut, theksoi se mirësia është ajo që e mban gjallë.
“Çfarë kam bërë për të tjerët? Kjo është pyetja që më udhëheq. Qëllimi i shpirtit tim është të sjell dritë në botë përmes gjithçkaje që bëj. Nuk dua ta mbaj vetëm për vete, dua ta ndaj.”
Ajo e përshkroi jetën si një dhomë me errësirë, ku ne jemi thirrur të ndiznim dritën, jo të fshiheshim prej saj.
Në një reflektim të sinqertë, Madonna pranoi se dikur ishte e robëruar nga mendimet e të tjerëve për të.
“Dikur isha skllave e asaj që njerëzit mendonin për mua. Por e vërteta është që unë nuk përshtatem dhe kjo është ajo që më ka shpëtuar.”
Në qershor 2023, Madonna u shtrua në spital për një infeksion të rëndë bakterial dhe kaloi disa ditë në koma të induktuar. Ajo përshkroi atë që e quan “përvojë shpirtërore”, që ndryshoi mënyrën si e sheh jetën dhe marrëdhëniet me të tjerët.
“Isha pothuajse në anën tjetër. Nëna ime u shfaq dhe më pyeti: ‘A do të vish me mua?’ Dhe unë thashë jo. Asistentja ime më dëgjoi ta thosha këtë, edhe pse isha pa ndjenja. U zgjova. Dhe e kuptova: ajo ‘jo’ ishte nevoja ime për të falur.”
Në tetor 2024, vëllai i saj më i vogël, Christopher Ciccone, ndërroi jetë në moshën 63-vjeçare. Marrëdhënia e tyre kishte qenë shpesh e tensionuar dhe për vite me radhë nuk kishin pasur kontakt.
Ajo tregoi se për vite të tëra ndjente zemërim ndaj tij dhe se kur ai u sëmur e i kërkoi ndihmë, nuk ishte e sigurt nëse do ta ndihmonte.
“Kur dikush që e do tërësisht të lëndon, është shumë e vështirë ta pranosh. Mendova: ‘A do ta ndihmoj armikun tim?’ Por e bëra. Dhe ndjeva çlirim.
Ishte sikur më ishte hequr një barrë nga shpina. Fola me të, i mbajta dorën, dhe i thashë: ‘Të dua dhe të fal.’”
Në fund të intervistës, Madonna u bëri thirrje njerëzve që të mos marrin asgjë për të mirëqenë dhe të jetojnë me përulësi.
