Me dhjetëra media në Kosovë dhe Shqipëri arritën të zbulojnë një fenomen të ri në rrugët e Kosovës: një fantazmë me këmbë dhie që shëtiste lirshëm nëpër Prishtinë. Një imazh i çuditshëm, mjaftueshëm tronditës për të tërhequr vëmendje dhe bindës aq sa për të mos ngritur një pyetje të thjeshtë: a është i vërtetë?
Çfarë mungoi, edhe këtë herë, ishte një element themelor i gazetarisë: verifikimi. Një foto e gjeneruar përmes inteligjencës artificiale u shpërnda dhe u trajtua si lajm, pa kontekst, pa burim të qartë dhe pa asnjë filtër profesional.
Pas raportimeve të fundit, Këshilli i Mediave të Shkruara të Kosovës reagoi duke sqaruar se e ashtuquajtura “Fantazma e Prishtinës” ishte, në fakt, një foto e gjeneruar përmes Inteligjencës Artificiale (AI), e shpërndarë dhe e trajtuar si lajm pa asnjë kontroll paraprak.
Megjithatë, dëmi tashmë ishte bërë: qytetarët ishin të shqetësuar dhe ne dëshmuam një tjetër shembull se sa lehtë një përmbajtje e rreme mund të fitojë statusin e lajmit, mjafton të publikohet shpejt dhe pa asnjë pyetje.
Ky rast nuk flet vetëm për fuqinë gjithnjë në rritje të teknologjisë, por edhe për mungesën e profesionalizmit në një pjesë të medias. Në një kohë kur AI është gjithnjë e më e aftë të krijojë foto/video bindëse, pritshmëria minimale nga mediat mbetet po ajo e vjetra: të ndalen, të pyesin dhe të verifikojnë.
Sepse kur imagjinata raportohet më shpejt se realiteti, realiteti mbetet pa zë.
