Kohët e fundit, një histori prekëse nga Japonia është bërë virale në internet, duke grumbulluar miliona shikime në rrjetet sociale. Në qendër të saj është Punch, një majmun i vogël i llojit makak që jeton në Kopshtin Zoologjik të qytetit Ichikawa, i cili është kthyer në sensacion për një arsye shumë të veçantë: ai nuk ndahet asnjëherë nga lodra e tij prej pelushi.
Punch u braktis nga nëna menjëherë pas lindjes dhe u rrit nga kujdestarët e kopshtit zoologjik. Ata e ushqyen me biberon dhe u kujdesën me përkushtim për të, duke ndjekur nga afër zhvillimin e tij derisa erdhi momenti të rikthehej në të njëjtin ambient me majmunët e tjerë.
Por integrimi nuk ishte i lehtë. Ashtu si ndodh shpesh me kafshët që rriten pa praninë e nënës, Punch shfaqi pasiguri dhe vështirësi në socializim. Makakët e tjerë nuk e pranuan menjëherë, duke e shmangur dhe mos e përfshirë në grup.
Për ta ndihmuar të përballonte stresin, kujdestarët i dhanë një lodër prej pelushi, një orangutang të vogël nga IKEA. Që nga ai moment, Punch e mban lodrën pothuajse gjithmonë me vete. Ai fle me të, e përqafon në çaste ankthi dhe duket se gjen tek ajo një ndjenjë sigurie dhe qetësie.
View this post on Instagram
Videot ku ai shfaqet duke lëvizur me lodrën në krah janë shpërndarë masivisht në rrjete sociale. Historia e tij është pasqyruar edhe nga media ndërkombëtare, ndërsa shumë vizitorë kanë shkuar në kopshtin zoologjik për ta parë nga afër Punchin dhe “shokun” e tij të vogël. Madje, pas viralitetit që historia mori, shitjet e lodrës prej pellushi u rritën ndjeshëm dhe produkti u bë ‘sold out’ menjëherë në dyqanet IKEA.
Sipas ekspertëve, te primatët kontakti fizik dhe ndjenja e sigurisë janë thelbësore në fazat e para të jetës. Kur ndarja nga nëna ndodh herët, një objekt mund të shërbejë si element stabiliteti dhe mbështetjeje emocionale.
Sot, Punch po vazhdon gradualisht procesin e integrimit në grup. Lodra prej pellushi mbetet pjesë e përditshmërisë së tij, ndërsa kujdestarët monitorojnë me kujdes përparimin.
View this post on Instagram
