Jennifer Lopez ka ndarë një nga momentet më personale dhe prekëse të jetës së saj, duke treguar se si një film dhe një bisedë me të atin e ndihmuan të përballej me periudhën e vështirë pas divorcit nga ish-bashkëshorti i saj, Ben Affleck.
E ftuar në podkastin e Brett Goldstein, këngëtarja dhe aktorja rrëfeu se filmi brazilian I'm Still Here pati një ndikim të fortë emocional tek ajo.
Ajo tregoi se në atë periudhë ishte e sëmurë dhe po kalonte ditët para Krishtlindjeve në shoqërinë e familjes së saj. Ndërsa po përballej me ndarjen nga Affleck dhe mendonte vazhdimisht për fëmijët e saj, vendosi të shikonte filmin së bashku me prindërit dhe të afërmit.
Filmi rrëfen historinë e vërtetë të Eunice Paiva, e luajtur nga Fernanda Torres, e cila luftoi për të zbuluar të vërtetën mbi zhdukjen e bashkëshortit të saj gjatë diktaturës ushtarake në Brazil. Historia e preku aq shumë Jennifer Lopez, sa nuk mundi t’i mbante lotët.
“Po mendoja për fëmijët e mi, për marrëdhënien me babanë tim dhe për shumë gjëra personale”, rrëfeu ajo.
Edhe pse u përpoq të mos e tregonte emocionin e saj, babai i saj e kuptoi menjëherë se diçka nuk shkonte.
Momenti që e preku më shumë, sipas saj erdhi kur i ati iu afrua, i mbajti fytyrën me duar dhe i tha: “Të dua. Gjithmonë të kam dashur.”
Sipas Lopez, ato fjalë shënuan një pikë kthese në jetën e saj.
“Diçka ndryshoi brenda meje në atë moment”, tha ajo.
Artistja shpjegoi se kjo përvojë e ndihmoi të linte pas një kapitull të vështirë të jetës së saj dhe të shëronte plagë emocionale që kishte mbartur prej kohësh.
Sot, Jennifer Lopez dhe Brett Goldstein shfaqen së bashku në filmin Office Romance, ndërsa rrëfimi i saj ka prekur mijëra fansa, të cilët e kanë përgëzuar për sinqeritetin me të cilën foli për një nga periudhat më të vështira të jetës së saj.
