Për shumë njerëz, mediat sociale janë kthyer në një hapësirë ku ndajnë historitë e tyre më personale dhe sfidojnë stereotipet. Për Natalie Brooker, kjo histori lidhet me alopecinë, një gjendje autoimune me të cilën ajo jeton prej më shumë se 20 vitesh.
Natalie shpjegon se alopecia ndodh kur sistemi imunitar sulmon gabimisht folikulat e flokëve, duke shkaktuar rënie të flokëve në lëkurën e kokës ose edhe në pjesë të tjera të trupit. Gjendja mund të shfaqet papritur ose gradualisht dhe, ndërsa tek disa persona flokët rriten sërish, tek të tjerë humbja e tyre mund të jetë e përhershme.
“Nuk ka një kurë përfundimtare”, thotë ajo, duke shtuar se trajtimet funksionojnë ndryshe për secilin person. Disa zgjedhin të mbajnë paruke, të tjerë shamia koke, ndërsa disa preferojnë të rruajnë plotësisht kokën. Për Natalie-n, më e rëndësishmja është që secili të gjejë mënyrën e vet për t’u ndier mirë me veten.
Përvoja e saj ka ndryshuar rrënjësisht mënyrën se si e sheh bukurinë. Sot, ajo e lidh atë me forcën, qëndrueshmërinë dhe aftësinë për të qenë e pambrojtur.
“Alopecia nuk ka të bëjë vetëm me humbjen e flokëve. Ka të bëjë edhe me humbjen e kontrollit mbi diçka që shumica e njerëzve e marrin si të mirëqenë”, shprehet ajo.
Sipas saj, pasojat e alopecisë shpesh shkojnë përtej pamjes fizike. Gjendja mund të ndikojë ndjeshëm në vetëbesim, shëndetin mendor dhe mënyrën se si një person e percepton veten, veçanërisht në një shoqëri ku flokët lidhen ngushtë me identitetin dhe feminitetin.
Mesazhi që Natalie dëshiron të përcjellë është i qartë:
“Dua ta normalizoj alopecinë në mënyrë që gratë e tjera të kuptojnë se humbja e flokëve nuk do të thotë fundi i botës”, thotë ajo.
Ekspertët theksojnë se rënia e flokëve tek gratë është më e zakonshme sesa mendohet. Sipas të dhënave të cituara nga mediat britanike, deri në një në dy gra mund të përjetojë rënie të flokëve në një moment të jetës së saj. Shkaqet janë të ndryshme dhe përfshijnë çrregullimet e tiroides, stresin, ndryshimet hormonale, efektet anësore të medikamenteve dhe trajtime si kimioterapia.
Pikërisht për këtë arsye, ndikimi emocional mund të jetë edhe më i madh, pasi flokët vazhdojnë të konsiderohen një pjesë e rëndësishme e identitetit femëror.
