Pas muajsh spekulimesh, aludimesh dhe teorish nga fansat, Tom Holland dhe Zendaya duket se kanë konfirmuar më në fund atë që shumëkush dyshonte prej kohësh: ata janë zyrtarisht të martuar.
Gjatë turneut promocional të filmit të ri Spider-Man: Brand New Day, aktori britanik i dha fund thashethemeve me një përgjigje të shkurtër, por domethënëse. I pyetur nëse fotot e tyre të dasmës të krijuara nga inteligjenca artificiale kishin shkaktuar konfuzion te familjarët dhe miqtë, Holland u përgjigj:
“Jo, sepse të gjithë ishin aty”.
Me vetëm pak fjalë, aktori konfirmoi atë që fansat prisnin prej muajsh. Çifti, i cili u njoh gjatë xhirimeve të filmave Spider-Man, ka qenë në qendër të vëmendjes që prej vitit 2017, megjithëse ka zgjedhur ta mbajë lidhjen larg ekspozimit të tepërt publik.
Sinjalet për një martesë të fshehtë nisën të shtoheshin në fillim të vitit. Stilisti i njohur i Zendaya-s, Law Roach, la të kuptohej në tapetin e kuq të Golden Globes se ceremonia “kishte ndodhur tashmë”, ndërsa më vonë aktorja u fotografua me një tatuazh minimalist me shkronjën “t”, që besohet të jetë një dedikim për Tom-in. I njëjti simbol u vu re edhe në një fotosesion të Holland për revistën GQ.
Gjatë paraqitjeve të tyre të fundit publike, çifti nuk e fshehu dashurinë. Mes buzëqeshjeve, shikimeve plot dashuri dhe një kimie që fansat e njohin mirë, Holland dhe Zendaya u shfaqën më të lumtur se kurrë.
Vetë aktori ka folur edhe më herët për rëndësinë e partneres së tij në jetën personale.
“Kam gjetur njeriun tim. Ajo është shoqja ime më e mirë dhe ndihem më i lumtur kur jam pranë saj. Nuk jam ndier kurrë kaq i mbështetur dhe i sigurt”, është shprehur ai.
Për fansat e Marvel-it, kjo histori duket se ka kaluar përtej ekranit: Peter Parker dhe MJ nuk janë më vetëm një çift në film, por edhe në jetën reale.
