Vera dhe ditët në plazh sjellin shpesh pyetje të papritura nga fëmijët rreth trupit të njeriut. Një prej tyre është edhe: “Pse mami e mbulon gjoksin me rroba banje, ndërsa babi dhe djemtë e vegjël jo?”. Edhe pse mund t’i zërë prindërit në befasi, ekspertët thonë se përgjigjja nuk duhet të jetë as e ndërlikuar dhe as e sikletshme.
Sipas ekspertes Elina Mavropoulou, e rëndësishme është që prindërit të fokusohen te pyetja e fëmijës dhe jo te debatet e të rriturve. Fëmijët zakonisht e bëjnë këtë pyetje me natyrshmërinë që do të pyesnin se çfarë do të hanë për drekë.
Ekspertja sugjeron përdorimin e një gjuhe të thjeshtë dhe të sinqertë. Një përgjigje e mundshme mund të jetë:
“Disa gra dhe vajza e mbulojnë gjoksin sepse e konsiderojnë një pjesë private të trupit të tyre. Ka edhe gra që zgjedhin të mos e mbulojnë dhe kjo është gjithashtu në rregull.”
Një pyetje e tillë mund të shndërrohet në një mundësi për të folur me fëmijën për kufijtë personalë, pjesët intime të trupit dhe respektin ndaj zgjedhjeve të njerëzve të tjerë. Në të njëjtën kohë, ndihmon fëmijët të kuptojnë se jo të gjithë njerëzit bëjnë të njëjtat zgjedhje dhe se dallimet janë pjesë normale e jetës.
Megjithatë, specialistët këshillojnë që të mos jepet më shumë informacion sesa kërkon fëmija. Në këto biseda, është vetë fëmija ai që duhet të udhëheqë ritmin dhe drejtimin e diskutimit.
Në fund, ajo që ka më shumë rëndësi nuk është të gjendet “përgjigjja perfekte”, por të krijohet një atmosferë ku fëmija ndihet i lirë të bëjë pyetje dhe të marrë përgjigje të qarta, të qeta dhe pa paragjykime.
-
10 profesione ku gratë jo vetëm shkëlqejnë, por edhe paguhen më shumë
16 Qershor, 20:13 -
-
-
