Sharon Stone ka folur hapur për një nga momentet më të vështira të jetës, duke pranuar se pas vdekjes së nënës së saj në vitin 2025 ndjeu një emocion që shumë njerëz e kanë të vështirë ta pranojnë: lehtësim.
Në një intervistë për podkastin e CNN me Anderson Cooper, aktorja shpjegoi se nëna e saj kishte jetuar gjithë jetën e traumatizuar dhe e mbushur me frikë e turp, gjë që ndikoi edhe në marrëdhënien mes tyre.
"Nëna ime ishte një person shumë i traumatizuar. Ajo nuk mundi kurrë ta kapërcente turpin dhe frikën që mbante brenda vetes", u shpreh Stone.
Aktorja tha se kujdesi për një person që po shuhet për një kohë të gjatë mund të jetë rraskapitës, ndaj ndjenja e lehtësimit pas humbjes nuk duhet parë si diçka e gabuar.
"Njerëzit mendojnë se nuk të lejohet të ndiesh emocione pozitive pas vdekjes së dikujt, por në fakt ato ekzistojnë. Kur je kujdesur për një person për një kohë të gjatë, kujdestari mund të shkatërrohet emocionalisht dhe, kur gjithçka përfundon, ndien një lehtësim të madh", tha ajo.
Stone shtoi se kultura shpesh nuk lë vend për emocione të përziera gjatë zisë, megjithëse ato janë krejtësisht normale.
"Ka shumë arsye të ndërlikuara pse dikush mund të ndiejë lehtësim pas një vdekjeje. Për mua ishte e pranueshme të ndihesha e çliruar nga nëna ime, e çliruar edhe nga trauma e saj, tani që ajo nuk ishte më", rrëfeu aktorja.
Gjatë bisedës, Sharon Stone foli edhe për gjyshin e saj, të cilin e përshkroi si një njeri të dhunshëm dhe abuzues që kishte lënë plagë të thella në familje.
"Ai abuzoi me nënën time dhe bëri gjithçka që mundi për të na lënduar. Nuk ishte gjyshi që do të doje. Ishte një njeri që përpiqeshim ta shmangnim me çdo kusht", tha ajo.
Aktorja kujtoi se ishte vetëm 14 vjeçe kur ai ndërroi jetë, ndërsa motra e saj ishte 11. Ajo pranoi se funerali i tij nuk u shoqërua me pikëllim, por me një ndjenjë çlirimi.
"Është shumë e çuditshme kur përvoja jote e parë me vdekjen shoqërohet me gëzim, lehtësim dhe një ndjenjë boshllëku", tha Stone.
