Nga vezët te arrestimet: Një përmbledhje e protestës para Kuvendit

Foto: Citizens.al

Protesta e 2 korrikut para Kuvendit të Shqipërisë u shoqërua me tensione të forta mes qytetarëve dhe Policisë së Shtetit, duke shënuar protestën e 33-të të organizuar kundër ndërtimit të resortit turistik në Zvërnec, korrupsionit, klasës politike dhe problematikave të tjera sociale e ekonomike.

Ndryshe nga protestat e mëparshme, këtë herë tubimi nisi përpara Kuvendit, në të njëjtën kohë me zhvillimin e seancës parlamentare. Protestuesit goditën me vezë, miell dhe ujë hyrjet e institucionit, makinat e deputetëve dhe ministrave, si një formë simbolike proteste. Mes automjeteve të goditura ishte edhe makina e kryetarit të Kuvendit, Niko Peleshi, ndërsa përfaqësues të Partisë Demokratike u pritën me thirrjet "Nuk na përfaqësoni" dhe "Opozitë e shitur".

Situata u tensionua më tej kur protestuesit bllokuan daljet e Kuvendit, përfshirë edhe daljen e emergjencës. Për të krijuar mundësinë që deputetët të largoheshin nga godina, policia ndërhyri me ujë dhe spraj irritues për shpërndarjen e turmës.

Brenda pak minutash, protesta degradoi në përplasje fizike. Në pamjet e publikuara në rrjetet sociale shihen protestues që tërhiqen zvarrë ose goditen me shkopinj gome gjatë shoqërimit nga efektivët e policisë. Nga ana tjetër, Policia e Shtetit deklaroi se ndërhyrja ishte në përputhje me situatën e krijuar dhe se reagimi i forcave të rendit ishte proporcional.

Sipas Policisë, deri tani janë shoqëruar 23 persona, ndërsa disa prej tyre janë arrestuar. Veprat penale të referuara përfshijnë "shkatërrim prone", "kundërshtim të punonjësit të policisë së rendit publik", "prishje të qetësisë publike" dhe, në disa raste, "pjesëmarrje në tubime të paligjshme".

Nga ana tjetër, avokati Gentian Sejrani, i cili përfaqëson disa prej të ndaluarve, deklaroi se klientët e tij mohojnë të kenë kryer vepra penale dhe pretendojnë se janë dhunuar gjatë ndërhyrjes policore. Sipas tij, disa protestues kanë pohuar se përplasjet kanë ndodhur edhe me truprojat e ish-ministrit Ulsi Manja, ku njëri prej protestuesve, referuar dhe pamjeve të shpërndara gjerësisht online, pretendon se i kanë thyer hundën.

Për ngjarjen reagoi edhe kryeministri Edi Rama. Në një postim në rrjetin social X, ai shkroi se "kalimi në dhunë fizike është e vetmja gjë që mund të prodhojë tanimë korja e zezë e dështakëzemërakëve të bulevardit politiko-mediatik të Tiranës", duke shtuar se nevojitet durim dhe reflektim.

Ndërkohë, aktivistët kanë publikuar video ku pretendojnë se dhuna është ushtruar nga policia, ndërsa përfaqësues të mazhorancës kanë dënuar aktet e dhunës ndaj forcave të rendit.

Bilanci paraprak i protestës flet për 12 punonjës policie të lënduar, 23 persona të shoqëruar dhe disa të arrestuar, të cilët pritet të dalin përpara Gjykatës së Tiranës për vlerësimin e masave të sigurisë.

Megjithatë, protesta nuk u mbyll me kaq. Si zakonisht, qytetarët u mblodhën fillimisht në Sheshin Skënderbej dhe më pas marshuan drejt Kryeministrisë, ku vijuan protestën duke dënuar ndërhyrjen e Policisë së Shtetit dhe duke kërkuar lirimin e të ndaluarve.

Gjatë tubimit u dëgjuan vazhdimisht thirrjet "Lironi çunat!", ndërsa protestuesit deklaruan se do të vijojnë reagimin e tyre edhe në ditët në vijim, duke kërkuar përgjegjësi për dhunën e ushtruar gjatë protestës dhe lirimin e personave të arrestuar.