Këngëtarja Taylor Swift dhe ylli i futbollit amerikan Travis Kelce janë zyrtarisht burrë e grua. Çifti u martua të premten, më 3 korrik, në një ceremoni luksoze të organizuar në sallën e famshme Madison Square Garden në Nju Jork, në praninë e rreth 1 mijë të ftuarve.
Sipas përfaqësuesve të këngëtares, ceremonia ishte menduar deri në detajin më të vogël. Veshjet e nuses dhe dhëndrit u krijuan posaçërisht nga shtëpia e modës Dior, nën drejtimin krijues të Jonathan Anderson. Fustani i Taylor-it ishte krijimi i parë i stilistit për një nuse me famë botërore. Këpucët u realizuan me porosi nga Christian Louboutin, ndërsa bizhuteritë ishin të markës Cartier.
Në vend të shoqëruesve tradicionalë të nuses dhe dhëndrit, Taylor zgjodhi vëllain e saj Austin Swift si njeriun më të afërt në ceremoninë e saj, ndërsa Travis pati si dëshmitar vëllain e tij, Jason Kelce. Ceremoninë e drejtoi aktori dhe miku i tyre Adam Sandler.
Menjëherë pasi u shpallën burrë e grua, ekranet gjigante jashtë Madison Square Garden shfaqën mesazhin: "Sapo u martuan!"
Në dasmë morën pjesë shumë emra të njohur të botës së artit dhe sportit, mes tyre Gigi Hadid, Bradley Cooper, Dakota Johnson, Mariska Hargitay, Peter Hermann, Ed Sheeran, Cherry Seaborn, motrat Haim, Ellie Goulding, Benson Boone, Maren Morris, Kelsea Ballerini, Miranda Lambert, grupi The Chicks, Brad Paisley, Kimberly Williams-Paisley, Hugh Grant, Karlie Kloss, Joshua Kushner, Zoë Kravitz, Jason Sudeikis, Ethan Hawke, Jimmy Fallon dhe Tommy Hilfiger.
Një natë para dasmës, çifti organizoi një darkë intime prove në teatrin Infosys, brenda Madison Square Garden, ku morën pjesë familjarët dhe miqtë më të afërt.
Mes të ftuarve u panë Lena Dunham, Jack Antonoff, Abigail Anderson, Erin Andrews, Charissa Thompson, Greg Olsen dhe Aric Jones. Bradley Cooper dhe Ashley Avignone mbërritën veçmas, ndërsa Selena Gomez publikoi një fotografi nga makina e saj teksa shkonte drejt festës.
Burime pranë organizimit treguan se Madison Square Garden ishte transformuar plotësisht për ceremoninë. Ditët para dasmës, dhjetëra kamionë transportuan pajisje, dekorime dhe madje edhe sipërfaqe me bar natyral brenda arenës. Jashtë u panë edhe kuti me mbishkrimet "Garden Party" dhe "Mirror Ball", ndërsa një burim u shpreh se nuk e kishte parë kurrë arenën të dukej kaq ndryshe.
Një ditë para ceremonisë, përfaqësuesit e Taylor Swift njoftuan gjithashtu se çifti kishte dhuruar 26 milionë dollarë për disa organizata bamirëse, mes tyre Feeding America, ASPCA dhe fondacionin Imagination Library të Dolly Parton.
Taylor Swift dhe Travis Kelce shpallën fejesën në gusht të vitit 2025 përmes një postimi të përbashkët në rrjetet sociale, ku ndanë fotografi nga propozimi romantik në një kopsht. Në njërën prej tyre, Travis shihej i ulur në një gju përpara se t'i kërkonte Taylor-it të martohej me të.
Historia e tyre nisi në vitin 2023, pasi Travis Kelce tregoi publikisht se kishte tentuar t'i dhuronte Taylor Swift një byzylyk miqësie me numrin e tij të telefonit gjatë një koncerti të turneut të saj. Edhe pse nuk arriti ta takonte atë mbrëmje, më vonë e shprehu interesin publikisht në podkastin e tij dhe, falë ndërhyrjes së disa personave të afërt, të dy filluan të njiheshin.
