Titulli në fakt duhet të ishte: “Pse topat e tenisit janë në ngjyrë X”, por duke qenë se pamja e tij është një ndër debatet më të pazgjidhura në internet, vështirë të përcaktonim një ngjyrë. Për lehtësi, për ngjyrën do të përdorim në vijim termin “neon”.

Si fillim, pse topat e tenisit kanë këtë ngjyrë?

Duke qenë një send krejt i pavlerë, ne e marrim të mirëqenë pamjen e tij. Megjithatë ngjyra nuk është pa ndofarë rëndësie. Tenisi lindi në vitet 1870 në Angli dhe fillimisht luhej nëpër lëndina. Asokohe, ngjyra e topit ishte e bardhë ose e zezë, ndërsa materiali ndryshonte; disa herë ishte prej leshi, ndërsa në disa raste bëhej edhe me flokë njerëzish.

Për gati një shekull, topat e tenisit qenë të bardhë ose të zinj. Por me ndryshimin e teknologjisë, topat e bardhë/të zinj ndaluan së prodhuari.

Në 1960, BBC transmetoi kampionatin Wimbledon me ngjyra për herë të parë. Ndjekja e topit nga teleshikuesit qe e vështirë, ndaj ngjyra e bardhë u zëvendësua me atë neon.

Kthehemi te pyetja në titull: Çfarë ngjyre ka një top tenisi?

Debati daton që prej një viti më parë, kur YouTuberi @CPG Grey shkroi në Twitter: “Na ndihmoni të zgjidhim një debat martesor: Topi i tenisit është i verdhë apo jeshil?”. Në dukje e panevojshme, ngjyra e topit shkaktoi debat.

Federata Ndërkombëtare e Tenisit e cilëson ngjyrën e topit si “e verdhë optike” që në Color Hex Color Codes ka kodin #ccff00 dhe përshkruhet si “e verdhë fluoreshente” ose “lime elektrike” nisur nga ngjyra e agrumes me të njëjtin emër. Por lime është nuancë e ngjyrës së gjelbër, çka vështirëson zgjedhjen e verdhë vs. jeshile.

- Përshtatur nga CNN